Kyrmen ka UDP ban jia biang kum ha u snem 1997 na Jaintia

Shillong, 23 Iaiong:
Ka United Democratic Party (UDP) ka la kyrmen ba ka elekshon 2018 kan wan jia biang kumba long ha u snem 1997 ha Jaintia Hills, ha kaba ka party kan jop lut baroh 7 tylli ki konstitwensi bad ban long ka party kaba bun paid tam ha ka iing dorbar.
Ha ka jingiakren bad u General Secretary ka UDP u Dr Jemino Mawthoh, u la ong ba ka UDP ka la kyrmen skhem ba ka elekshon MLA 2018 kan long kumba jia ha u snem 1997 ha kaba ka long ka party kaba bun paid tam ki MLA ha ka iing dorbar thawain kaba don 60 ngut ki MLA.
“Ka UDP ka khlain bha ha Jaintia Hills ha kane ka kynti, bad ngi kyrmen ba ka elekshon 2018 kan wan jia biang kumba long ha u snem 1997 ha kaba ngin ioh baroh ki jain spong”, la ong u Dr Mawthoh.
U la ong ba lyer ka elekshon na ka sur jong ki paidbah ka jyla, ka la beh bha ha kine ki sngi sha ka party riewlum ha kaba ka UDP kan long ka party kan jop bun bha bad ban bat ruh ia u shabuk ka jingsynshar. “Ngi la kyrmen ba ngin jop ym duna ia ka 20 ngut ki MLA ha kane ka elekshon ban wan ha baroh kawei ka jylla”, la ong u Dr Mawthoh, uba long ruh u MLA na ka Nongthymmai.
Kumba ka long mynta, ka UDP ka don tang phra ngut ki MLA ha kaba ka la shong baroh san snem ha ka liangsynshar khlem iasoh satia bad ka Congress kaba synshar ha kane ka jylla.
Katkum ka jingong u nongialam ka UDP, ka party kan ialam ia ka sorkar ha kane ka kynti ban wan namar ba ki paidbah ki la ngiah bad sngewthuh ia ka jingsynshar ka Congress kaba wanrah ia ka jinghiar ha ka ioh ka kot khamtam ha ka rukom pyniaid pisa kaba long lymmuh bha, kaba buh jingeh ia ka jylla bad ia ki paidbah.