Kyrkhu kyrdoh ki heh Congress ia ki nongialam samla ka seng

Shillong, 28Naiwieng:
Ha ka 25 tarik mynta u bnai ka la don ka jingiakhun elekshon non gkitkam hapoh ka Youth Congress bad ha ka 27 tarik pat la pynbna ia ka resol ki nongjop, u Richard R Marak u la shah jied kum u President ba thymmai ka Youth Congress, u Jlan K Rymbai kum u Vice President, ka Madonna Bakordor Langstieh bad u Banang Tynsong kum ki General Secretary bad kiwei pat ki nongkitkam.
Ha ka elekshon na bynta ka Shillong Lok Sabha pat ia ka kam President la jop da u Kyrshan Pamshong bad ka V Bansharai Kharchandy kum ka Vice President bad kiwei kiwei ki nongkitkam. Ha ka Tura Lok Sabha pat ia ka kam President la ioh da u Allan Sylvester Marak, u Rana Sangma kum u Vice President, u Stevie Marak, Tangseng Marak, ka Anamika Momin, u Hendrick Marak bad u Janglan Sangma kum ki General Secretary ryngkat bad kiwei ki nongkitkam. Ia ka kyrteng jong baroh kitei ki nongkitkam ba thymmai jong ki samla ka seng Congress , ka seng ka dang phah sha ki heh jong katei ka seng ban ioh ia ka jingmynjur.
Kitei ki nongkitkam thymmai ki samla Congress mynta ka sngi ki la leit ruh ban ia kynduh ia u President ka MPCC u bah D.D Lapang bad kumjuh ruh ia u myntri rangbah ka jylla u Dr.Mukul Sangma ban pynithuh ia ki nongkitkam thymmai. Ha katei ka jingiakynduh kitei ki 2 ngut ki heh Congress ki la kyrkhu kyrdoh bad kyntu kynpham ia ki samla katei ka seng ba kin trei shitrhem na bynta ban pynkhlain bad ban pyntyllun ia ka rukom treikam ka seng hapoh kane ka jylla.