Shillong:U Myntri Rangbah ka jylla, u iathuh myn hynnin ka sngi hapoh ka iingdorbar, ba ka don ka jing kyrduh IAS ophisar kaba khraw ha ka jylla ha kaba jan mar shiteng na kaba ka donkam ruh kim don satia. Dei na kane ka daw ka sorkar jylla ka pyrshah ia ka jingpynkylla thymmai ia ka Amendment to IAS cadre Rule, namar kane kan ktah jur ia ka jylla.
Ka jylla ka don tang 41 ngut ki IAS, katba katkum ka bhah ki dei ban don 77 ngut, ha kaba na ki 41 ngut tang 23 kiba pass ia ka UPSC, katba 18 na ki ki dei kiba la shu sieh ne kyntiew kyrdan.
Haba jubab ia ka jingkylli kaba la wanrah da ka MLA na East Shillong ka kong Ampareen Lyngdoh, u MR u la iathuh ba ka sorkar jylla ka la phah da ka dorkhas sha ka sorkar pdeng ba kan buh noh la ka jong ka Cadre na bynta ka jylla Meghalaya.
“Ka sorkar ka la shim ki lad ki lynti ban kyntiew ia ka jingdon ki IAS ophisar ha ka jylla da kaba ka pynmih ki jinghikai ban pass ia ka exam sha kito kiba kwah iakhun ia kane ka exam” ong u Myntri Rangbah.
Na kata ka daw keiñ ngi na ka JSM ngi dawa ban don ka Govt. Coaching Centre ha West bad East Jaiñtia Hills District na ka bynta ban ioh lad ki khun Samla jong ngi ban shah hikai pyntbit ban iakhun ha kum kine ki kyrdan.