Kyntu weng pakhang shnong ka CSWO

Shillong, 27 Nailur:
Ka CSWO ka la kyntu ia ka seng HNLC ba kan weng noh ia ka pakhang shnong kaba 24 kynta ban sdang naduh ka 6 baje janmiet ka 1 tarik Risaw haduh ka 6 baje janmiet 2 tarik Risaw namar ba ka don ka jinglehkmen Durga Puja.
Na ka liang ka CSWO, ha ka kyrwoh ba la pynlait da ka president Kong Agnes Kharshiing ka la kyrpad ia ka seng HNLC ba ka dei ban pyrkhat lem ia ki riewngeit Hindu kiba la im la sah hangne kum ki nongshong shnong ba kin ioh lad ban lehkmen Durga Puja da kaba burom ia ki namar ba kumba la iatip, kum ki Khristan ki dei kiba ieid ia ka jingsuk bad burom ia ki jingngeit jong kiwei pat. Sa kawei kane kan ktah jur ia ki paidbah ha ka trei ka ktah bad ka leit ka wan jongki.
Ka CSWO ka la kyntu ba ka seng ka dei ban iaid sha ka lynti ban wan sha ka jingiakren iasuk bad ka sorkar ban buh ia ka nuksa ia kiwei pat kaba bha na ka bynta ban ioh ia ka jingsuk kaba paka.