Kyntu u MLA ka Sohra ban thaw da ki ‘Corona center’ hapoh ka thain

Shillong: U MLA ka Sohra u bah Gavin Miquel Mylliem mynta ka sngi u la thoh sha u myntri rangbah ka jylla Meghalaya u Conrad K Sangma ban dawa na u, ban thaw ki jaka sah ba kyrpang ne ki ‘Quarantine center’ ia ki ‘Homestay’ kiba don hapoh Sohra kum shi bynta ban ai jaka sah shipor ia kiba shah ‘quanrantine’.

U MLA ka Sohra u la ai khublei ruh ia ka sorkar kaba thaw ki lad lynti haba dei bad ka jing tehlakam ia ka jing pang’corona virus’ hapoh ka jylla.

U bah Gavin Miquel Mylliem, u la kyntu ruh ia ka sorkar Meghalaya ban pynbiang ki tiar iada lane ki PPE naka bynta ki nongtrei hapoh ka Sohra CHC ban iada ia ki naka jing pang ‘corona virus’.

Nalor kine u bah Gavin Miquel Mylliem u la kyntu ruh ia ka sorkar Meghalaya ban pynbiang ki kali kit nongpang lane ki ‘Ambulance’ namar ka thain Sohra haduh mynta ka don tang kawei ka Ambulance hapoh ka CHC.