Kyntu U Dy. CM ia ki khynnah skul ban ieid ia ka mei mariang

Jowai, 5 Jylliew:
U Deputy Chief Minister, u Professor RC Laloo ula kyntu jur ia ki samla pule, ki khynnah skul bapher bapher ban kin aiti ia lade ha ki kam ban iada ia ka mariang nalor ba ki la aiti ia lada ha ki kam pule jong ki.
“Burom ia ki kmie ki kpa jong phi, ia ki nonghikai bad aiti ia lade na ka bynta ban pynneh pynsah ia ka mariang nalor ba phi la aiti ia lade ha ki kam pule jong phi”, la ong u Prof. RC Laloo haba kren kum u kongsan mynta ka sngi ha ka lympung rakhe ia ka World Environment Day.
Ka jingiarakhe ia kane ka sngi ha West Jaintia Hills la pynkreh da ka bor pyniaid District ha ryngkat ka jingiatreilang bad ka District Basin Development Unit, Jowai bad ruh ka office jong u Divisional Forest Officer (Social Forestry), Jowai hapoh ka Chief Minister’s Youth for Green Campaign  Movement and Green Meghalaya Campaign. Ia kane ka jingrakhe la pynlong ha madan ialehkai ka Kiang Nangbah Government College halor ka matpdeng “Sustainable consumption and Production” and  Slogan “Seven Billion Dreams. One Planet. Consume with Care”
U Dy. CM u la khot la wer ruh ia baroh ki paidbah nongshong shnong ban pynneh pynsah ia ka mei mariang bad iada ia ki lum, ki khlaw ki bthap, ki um ki wah bad ban pynlong ruh ia ka haw haw kaba khuid na ka bynta ban ioh ia ka lyer kaba khuid ban ring mynsiem.
Na ka liang u Deputy Commissioner, u bah PS Dkhar haba kren pidang, u la lamkhmat da kaba ong, “Ngim dei ban iada ia ka mariang tang kaba thung dieng, hynrei ngi dei ruh ban iada ia ka mariang da kaba lehkhuid ia ka sawdong sawkun.
U Additional Principal Chief Conservator of Forest, u bah B.K Lyngwa u la kren halor ka phang pdeng jong ka jingrakhe ia ka world Environment day. Katba ka samla pule Doli Lamare kaba pule ha St. Mary Mazzerello Girls’ Higher Secondary School, Jowai ruh ka la ai jingkren ha kane ka sngi.
Ka Drama kaba pynkreh da ki samla pule ka Kiang Nangbah Government College bad ka jingrwai tynrai kaba la rwai na ki samla na ka shnong Khimusniang ka la pynshoh bieij ia baroh kiba wan sha katei ka jingrakhe ia katei ka sngi.
Ha kane ka sngi la sam ruh ia ki khusnam kiba kynthup ia ki Certificates bad pisa kaba Rs. 5000/-, Rs. 3000/- and Rs. 2000/-sha kito ki nongjop ha ka jingiakop tainia, ia kop dro jingdro, thoh eassay nalor kiwei kiwei.