Kyntu U Bah Hek ia ki Asha

Shillong, 28 Nailar:
U Myntri ka koit ka khiah u Bah AL Hek u la ai mynsiem ia ki Asha ba kin thom ia ki jingeh kaba ki mad bad kin shim ia ka jingkit khlieh khnang ba ki paidbah kin ioh jing myntoi.
Haba kren mynta ka sngi, ha ka jngia kynduh lang jong ki Asha ba la pynlong da ka District Medical & Health Officers East Khasi Hills lyngba ka jingkyshan ka Natinal Health Mission ha U Soso Tham Auditorium hynne ka sngi u Bah Hek u la pynpaw ia ka jingsngewnguh ia ki Asha kiba la trei shitom ban wanrah ia ka koit ka khiah kaba pura sha ki nongshong shnong.
U la ong ba ka jingdon ka jong ki ka long shisha ka jingkyr khu sha ki longing longsem ha kaba ki la ioh ia ka jingtip kaba bun jait khamtam ha ka liang ka kha ka pun bad ka jingsumar ia ki longkmie bad ki khyllung.
U la ong ruh ba ki Asha ki long shisha ka jingkyrmen ia ki longing longsem namar ba wat hapdeng ki jingeh kiba bun pynban ki rung ha ki iing ki sem da ka khmat ba phuh samrkhie.
Shwa ia kane u Deputy Commissioner uba dei ruh u Chairman jong ka District Society u Bah CD Diengdoh u la ong ba ka jingthmu jong ka National Health Mission kadei ka koit ka khiah salonsar. U la ong ba dei ban kynthup ia ki Asha ban pynurlong ia kane ka jingthmu.
U la ong ba ki Asha ki la hap ban mad ia kiba bun ki jingeh ha ki jingtreikam jong ki ban pyntip sha ki paidbah shaphang ka jingdonkam ban leit kha khun sha ki Hospital, ka rukom ai bam ai dih ia ki khyllung bad ki kmie, ka jingleit phah peit Doktor ha ka por armet bad hadien ba ladep kha.
Kumta u ong ba ka long kaba donkam ban iatreilang bad ki bor shnong khnang ba ka kam kan long kaba jop.
Ka Kong A Sushiang ka State Asha Programme Manager ka la batai lyngkot shaphang ki kam bad ka jingkit khlieh jong ka Asha. Ka la ong ba nallor ki kam ba iadei ba ka koit ka khiah ki Asha kidei ruh ban iatreilang bad ka shnong ka thaw bad ki longing.
Ha kane ka jingiakynduh lang jong kki Asha la pynlong ruh ia ka jingsam khusnam ia ki PHC/ANM/ ASHA kiba la trei bha ia ki kam jong ki.
Ka Smit PHC ka la ioh ia ka nam kum ka PHC kaba biang eh katba ka Laitlyngkot, Swer bad ka Mawphlang PHC ki la ioh ia ka khusnam kum ki PHC kiba trei shitom.
Ha ka por mynstep la pynlong ka jingiaiaid paidbah na madan Iewrynghep Shillong ba la pynkut ha Soso Tham Auditorium.