Kyntu ka Synjuk ki Nongsynshar Shnong ka Bri U Hynniewtrep ia ki dorbar shnong ban ai jaka ‘quarantine’

Shillong:Myn hynnin ka sngi ka Synjuk ki Nongsynshar Shnong ka Bri u Hyniew trep ha ka jing ialam da U bah R.L Blah, ki la ia kynduh ia u myntri rangbah ka jylla u Conrad K Sangma, na ka bynta ban iathir halor ki kyndon ban pyntreikam, na ka bynta ki samla ba wanphai na kiwei pat ki jylla ka ri India.

Na ka liang U bah R.L Blah, haba kren bad ki lad pathai khubor u la ong, ba ka Synjuk ki Nong synshar Shnong ka la kyntu ia ka sorkar Megha laya ban nym shah ia ki samla ba wanphai na kiwei pat ki jylla ban leh ‘quarantine’ ha la ki ing, hynrei ka sorkar ka dei ban phah leh ‘quanrantine’ ia ki sha ki jaka ba la buh kyrpang da ka sorkar.

“Na ka liang u myntri rangbah ka jylla u Conrad K Sangma u la iathuh ha ngi ba ka sorkar kam lah ban ‘quarantine’ ia baroh 8000 ngut tam ki samla ba wanphai na kiwei pat ki jylla ka ri India, namar ka sorkar ka lah ban ai jaka sah shipor ha ki jaka kyrpang tang ia kumba 1000 ngut” la bynrap u bah RL Blah.
Haba dei bad kane u bah R.L Blah u la ong ba ki shnong bad ki nong ialam shnong, ki dei ban shim ka jing kit khlieh, na ka bynta ban ai jaka sah shipor ‘quarantine’ centre’ ha ki shnong da kaba pynkylla ia ki skul, ki dorbar hall bad ki jaka leh niam naka bynta ban pynkylla ia ki kum ki ‘quarantine centre’.
Na ka liang u CEM ka KHADC u bah Titosstarwell Chyne, u la kyntu ruh ia ka sorkar ban ai jing iarap ia kiba treimon sngewbha (volunteer) kiba bunkam ha ka jing iakhun pyrshah ka jing pang ‘corona virus’ hapoh ka jylla.
Nalor kane Synjuk ki Nongsynshar Shnong ka la bthah ruh ia ka sorkar ba kam dei ban ailad, ia ki iew heh ban plie bad ka kyntu ruh ia ka sorkar ba ka dei ban long ba phikir bad ban pynkhlain ia ka jing ia pyn jngai paidbah kum shi bynta ban tehlakam ia ka jing pur ka jing pang ‘corona virus’.