Kyntu ka sorkar ia ka HNLC, ban nym weng na ka iakren iasuk

Shillong:Ka Sorkar Jylla ha ka sngi Thohdieng ka la kyntu ia ka seng kieng atiar Hynniewtrep National Liberation Council (HNLC) ba kan nym weng satia ia ka jingiakren iasuk kaba la dep sdang, kumba la pynbna da ka seng ha ka 3 tarik mynta u Kyllalyngkot.

U Myntri Sorkar uba dei u nongaiktien ka Sorkar MDA -II, u Bah Paul Lyngdoh u la ong ba haduh mynta ka Sorkar kam pat shym la ioh jingtip eiei halor kane ka rai jong ka seng HNLC, hynrei la shu iohi ia ka jingpynbna jong ka seng tang ha ki lad pathai khubor.
U la ong ba wat la ka Sorkar kam pat shym la ioh ia ka jingthoh kaba shai na ka seng HNLC, hynrei kan shim khia ia kane ka kam bad tang shu wan phai u Myntri Rangbah u Conrad Sangma bad u Symbud Myntri Rangbah ba khmih ia ka kam pohïing (Police) sha ka Jylla, ka Sorkar kan shong ia ka jingïalang ba kyrkieh ban iakren halor kane ka jingpynbna jong ka seng HNLC.

Kawei na ki mat jingdawa jong ki nongialam ka HNLC ka long ba ka Sorkar kadei ban weng noh ia baroh ki jingmudui mukotduma (case) pyrshah ia ki dkhot bad nongialam jong ka seng. Haba kylli halor kane, u Bah Paul u la ong ba ia kane ka jingdawa lah ban ai, kata da kaba pynshongnongrim ia ki jait mukotduma, namar ha ka jingiakren iasuk kam dei ban pynhun ia ia kawei ka Liang hynrei dei ban don ka jingiasngewthug ban ai ban ban shim.

Lah ban kdew ba ka HNLC ka la pynbna paidbah ha ka 3 tarik mynta u bnai ba ka la weng noh ia ka jingiakren iasuk bad ka Sorkar pdeng kumjuh bad ka Sorkar Jylla, halor ka nongrim ba kam shym la pynurlong ia ka jingdawa jong ka seng.