|
Shillong: Ka seng ki samla pule Khasi Students’ Union South Khasi Hills ha ka 27 tarik u Jymmang 2019 ka la leit buh ia u dorkhas ha khmat jong u Executive Member (EM) incharge Trade jong ka Khasi Hills Autonomous District Council (KHADC) u bah Paul Lyngdoh ha ka ba ka la kyntu ia u ban leit jurip halor ka jing shah knieh bad leh trai ia ka khaii-pateng da ki bar jylla ha ki thain border Ichamati –Majai.
 Ha kane ka dorkhas, ba ki la leit aiti ia u EM bah Paul ka seng ka la pynpaw ba kat dang mih ki sngi, ki dukan ha kane ka thain khappud ki la nang roi sted ha duh ba ki la long u maw jynthud ia ki trai ri trai muluk ki ba im jakpoh da ka ba khai-pateng ha ka thain Ichamati–Majai.
“ Ngi la ioh ka jing ujor na ki para doh para snam jong ngi ba kim ioh lad shuh wat tang basn die jing die namar ki bar jylla ki la leh donbor, leh baheh bad khang lad ia ki ban shong madan ban die,” la thoh ha ka memorandum bad la kdewshai ruh ba kane kam shym jia tang ha Ichamati elaka jong ka Mawlong kaba kine ki bar jylla ki leh donbor hynrei u bar jylla u la mih paidbah ban khanglad ia ki bor jong ka Block ryngkat bad ki briew jong ka Police Department ban khynra ia ki trading license.
Kumta ka seng ka la kyntu kyrpad ia u EM Incharge Trade ka KHADC, u bah Paul Lyngdoh ba un shim khia halor kane bad leh eiei ban iada ia ka ri bad ka jait bynriew.
|
Phi don ban ong eiei?