Ki nongialam ka Khasi Students Union (KSU) lyngba ka Employment Monitoring Cell mynne ka sngi ka la ioh kynduh ia ka kong Idashisha Nongrang, IPS, ka Director General of Police (DGP) Meghalaya ban kyntu ban shah ban thoh eksamin ia baroh ki samla kiba la lah shah jied ha ka jingmareh (Physical Efficiency Test) ym ban shu jied katkum ka ratio 1:20.
Mynta ka sngi ki nongialam ka KSU ki la kynduh ia ka DGP ban iakren halor ka Office Memorandum ba lah mih na tnad Home (Police) ba yn shah thoh eksamin (written examination) tang ia katto katne ngut; kata ha ha ratio 1:20 (20 ngut na bynta kawei ka vacancy) na kiba la pass ia ka jingmareh (Physical Efficiency Test).
Katkum ka kyrwoh na u samla Rueben Najiar u Chairman ka Employment Monitoring cell ka KSU ula kdew ba ka seng ka la kyrpad ba dei ban ailad ia baroh ba kin thoh ia ka eksamin (written examination) hadien ba ki la lah ne shah jied ha ka jingmareh (PET) kumba la ki long ha ki snem ba la dep bad ym ban shuh jied katkum ka ratio 1:20.
Ka seng ka kyrpad ia kane halor ka nongrim ba na bynta ki kam bapher bapher hapoh ka tnat pulit, “ym lah ban shu jied tang ia kiba la wan sha khmat ha ki jingmareh khlem da ailad ne peit ia ka jingnang jingstad da kaba ailad ban thoh eksamin. Ban ioh ia ki briew kiba bit dei ban peit ha man ki bynta bad khlem da ailad ia ki ban thoh ia ki eksamin kan long leh noh ei,” la ong ka kyrwoh.
Ka seng ka la ban ruh ba ha ka jylla ki samla wad kam wad jam ki long kiba bun bad ki kam sorkar kiba lait ki long kiba duna, bad lada iaid katkum kane ka Office Memorandum ka mut kin don ki samla ki bym ioh ban thoh ia ki eksamin watla ki la shah jied (qualify) ha ki jingmareh (PET). Kane kan pynduh mynsiem ia bun ngut ki samla wad kam ha ka jylla.
Na ka liang jong ka DGP ka la pynshai ba na ka liang jong ka ruh ka sngewiahap ia kane ka bynta bad ka la don ka jingiakren ban pynkylla ia kane OM, hynrei ka rai kaba khatduh kan dei hi na ka sorkar. Ka dang ap ruh ban ioh ia ki jinglum jingtip jong baroh kiba lah shah jied ne pass ia ka jingmareh (PET) bad lada don kiba la pass ki ba nym ioh ban thoh. Na ka liang jong ka, ka la kular ba kan pyrshang ban ailad ia baroh kiba la pass ha ka jingmareh (PET) ba ki iohlad ban thoh ia ki eksamin ki jong ki.
Phi don ban ong eiei?