Kyntu ka HSPDP ia ka sorkar, ban shim khia ka jing tyrwa ka HNLC

Shillong: Ka Hill State People’s Democratic Party (HSPDP) ha ka jing ia lang mynta ka janmiet ka lah kyntu ia ka sorkar Meghalaya ban shim khia halor ka jing tyrwa ka Hynniewtrep National Liberation Council (HNLC ).

Ha ka jing ia lang mynta ka janmiet ka HSPDP ka lah mynjur ban kyrshan ia ka jing tyrwa ka HNLC ban wan iakren ia suk noh bad ka sorkar Meghalaya bad ka sorkar India.

U president ka HSPDP u bah K.P Pangniang u lah ong ba kum ka party ngi kwah ba kan nym don shuh ki ta ki seng kieng atiar ha ka jylla Meghalaya.
“Ngi kwah ba ka sorkar kan shim khia bha ia kane ka jing tyrwa ka HNLC namar ngi kwah ba ki khun samla ka jylla kin wanphai biang sha la ing” lah nynrap U K.P Pangniang. U lah ong ruh ka sorkar Meghalaya ka dei ba shim ia ka rai kumba ka shim na ka bynta ka seng Achik National Volunteers Council (ANVC) halor ka jing wan ia kren iasuk mynshwa.
Kum ba shu pynkynmaw ka Hynniewtrep National Liberation Council (HNLC) ha 1 tarik nohprah ka lah lapynpaw ia ka jing kwah jong ka seng ban poi sha ka jing iakren ia suk bad ka sorkar India bad ka sorkar Meghalaya.