Shillong: Ka East Jaintia National Council (EJNC) Central Executive Council mynta ka sngi ka kyntu ia ki paidbah ka jylla Meghalaya ban bud ia ki kyndon ba la btah ka sorkar Meghalaya kham tam ka tnat ka koit ka khiah ka jylla klum shibynta ban ia khun pyrshah ka jing pang ‘corona virus’.
Na ka liang ka EJNC ka la pynkynmaw ba ka sorkar India bad ka sorkar Meghalaya kumjuh ka la buh ki kyndon ia ki paidbah na ka bynta ban iada ialade na ka jing pang ‘corona virus’ kum ka jing kiar na ka jing ialum paidbah, sait bha ia ki kti bad set shyntur lada jyrhoh bad kiwei kiwei de.
U president ka EJNC u bah Samborwell Lyngdohlyngba ka kyrwoh u la ong ba ka long kaei kaei kaba sngewsih ba ki briew ki ialum bha khamtam ha jan ka ophis treikam ka Deputy Commissioner (DC) ka East Jaintia Hills District. Ka seng ka la pynpaw ba ka jing ialum briew jan man ka sngi ha jan ka ophis DC ka lah ban pur ka ia ka jing pang ‘corona virus’ bad kane kan buh jingma shibun ia ki paidbah bad ka thain baroh kawei.
Ka seng ka la pynpaw ba wat lada ka sorkar ka la pynjari korphiw hynrei ka long kaei kaei kaba lyngoh ban iohi ba ki kali ki iaid beit wat ha ka por korphiw. Ka seng ka pynpaw ka jing lyngoh ruh ia ka jing ioh wan tur ki briew na Malidor na ka jylla Assam na ka bynta ban wan wad bylla hapoh ki shnong ka jylla. Ka seng ka kyntu ia ki bor district khamtam ia ka ophis treikam ka DC EJH bad ki pulit ba kin long ki ba phikir bha na ka bynta ban talasi ia ki briew kiba thmu ban rung shapoh ka jylla.
Haba dei bad ka jing sam marbam sha ki paidbah, na ka liang ka EJNC ka kyntu ia baroh ki MLA bad ki MDC jong ka thain ban phai lem sha ki paidbah na ka bynta ban pynioh ia ki marbam mar dih kum ha kane ka por ba pakhang shnong ne ka ‘lock down’ ha baroh ka ri India.
Phi don ban ong eiei?