Jowai:Na ka liang ka All Jaintia Transporter Association (AJTA) ka la kyntu ia ki bor District ban pyllait ia ki dukan die tiar shna Power Tiller ban iarap ia ki nongrep.
“Kane ka juk kadei ka juk jong ki kor ki bor bad ki nongrep hi ki pyndonkam da ki kor ha ka rep ka riang bad haba ka sorkar ka la pyllait ia ki nongrep na ka Lockdown, ngi kynju jur ia ka sorkar ba kan plie ruh ia ki dukan die tiar (spare parts) na ka bynta ban ioh moramot ia ki power tiller bad kiwei kiwei de ki kor kiba pyndonkam ki nongrep”, la ong u President ka All Jaintia Transporters Association, u ma Balen Thubru.
Utei u nongialam ki Transporters, u la ong ba ki nongrep ki ia kynduh bun ki jingeh wat lada ka sorkar ka la pyllait ia ki na ka Curfew namar ka Lockdown ban iada ia ka jingsaphring u Khniang Covid 19. Ki nongrep ki ia kynduh jingeh ha kaban leit mih sha ki ophis ki DC lane District Agriculture Officer ban ioh ia ki kot ki sla ba donkam ha kaba iadei bad ka kam rep kam riang khamtam eh ban ioh ia ki Curfew Pass ban pynpoi ia ki kor, ki symbai, ki sboh sha ki jaka rep.
“Nalor ba la dier ka por rep, ki nongrep ki la hap ban pyllut bun ka por ha kaba leit wad ia kine ki Pass kumta nga kyrpad ki bor district bad ka sorkar ban pyrkhat kyrpang bad ban pynjynsur ha kaba iadei bad ki nongrep ka jylla”, la ong utei u nongialam ka AJTA.
Phi don ban ong eiei?