Kyntiew Deficit ia ki skul; hadien 30 Iaiong, byrngem iakhih ka FASTOM

Shillong:Ka Federation of All School Teachers Of Meghalaya(FASTOM), ka Federation jong ki nonghikai skul adhoc ka la pynlong ia ka General Meeting lane ka jingialang paitbah ha ka 07tarik Risaw 2023 ha Madan New Nongstoin.

Ia ka jingialang la pyniaid da u Vice President ka Federation, u bah Sanborn Jungai bad ha kane ka jingialang la wan ban shim bynta, da kumba 5 hajar tam ki nonghikai skul Adhoc kata naduh LP skul haduh Higher Secondary School. Ha kane ka sngi la ioh ban pynskhem ia ki nongkitkam ba pura jong ka FASTOM Central Body kata na ka bynta ka snem trei kam 2023- 2026.

Ki nongkitkam ba la pynskhem ki dei, U bah Diningroy Marwein, President, Bah Sainbor John Lyngdoh General Secretary, nalor kiwei pat.
Ha ka jingialang, la shim da ka sur jong u paitbah, ban ai por ia ka Sorkar ban pynurlong noh ia ki jingdawa jong ka Federation kata ban kyntiew deficit noh ia baroh ki Adhoc skul naduh LP haduh Hr.Secodary Skul kata haduh bad la buh por, ban pynurlong, ha ka 30tarik Iaiong 2024.Ka Federation ka la rai skhem ba lada ka sorkar kan iai leh mynthi haduh ka tei ka tarik, kan sa mih biang sha surok ban pynlong da ki jingiakhih ba kham tyngeh.