Kynthoh U Rajnath, halor ka ia kajia pud sha Dong Mihngi

Shillong, 12 Naitung:
U Myntri tnad kam pohiing ka ri U Rajnath Singh u la lum jingialang bad ki Myntri Rangbah ka Dong Mihngi ka India ban iakren ban pynkhlain ia ka shong suk shong sain.
Ka khubor sorkar ka la ong ba nalor ka shong suk shongsain, u Singh u la iathir jingmut ruh bad ki Myntri Rangbah ka thain ha kaba iadei bad ki kam pynroi, ka jingmih ki seng kieng atiar, ka jingiakajia  pud bad kiwei.
Nalor u myntri kam pohiing, la don lang ruh u Myntri khynnah kam pohiing u Kiren Rijiju, u myntri ka DoNER u Dr. Jitendra Singh,  u myntri tnad ialehkai ka ri  u Sarbananda Sonowal, u Secretary kam pohiing, ki  Chief Secretary ki  jylla Dong Mihngi bad ki DGP.
U Myntri kam pohiing u la ong ba ka jingia treilang kaba skhem bad kaba iajan hapdeng ka sorkar pdeng bad ki sorkar jylla ka long kaba donkam eh ban tehlakam ia ki kam pyntriem ha ka thain bad ka ri. Ka jingiadei kan wanrah ruh ia ka roi ka par kaba sted bad kaba iaid ryntih.
U Rajnath u la ong ba ka sorkar kan nym iakren eiei bad ki kynhun kieng atiar ha Garo Hills kiba mih kum ki tit ba thmu ban shu rahbor, dawa pisa bad pyniap ia ki briew. U la kyntu ia ki myntri rangbah ka thain ba kin pynleit jingmut ban pynneh ia ka suk ka sain bad ban ai ia ka jingshngain ia ki paidbah khamtam ha ki thain khappud. U la Singh u la kyntu ruh ba ki jylla ki dei ban pynkhlain ia ki police station kiba don ha khappud. U la kyntu ia ki Myntri Rangbah ba kin hukum ban pynlong ia ka jingkhynra ia ki tiar ialeh ba la shalan beain  bad ban leh da kaba tyngeh ia kiba donkti. Halor ki kam ia kajia pud jong ki jylla kum ka Assam bad ka Meghalaya, Assam bad ka Arunachal, Assam bad ka Nagaland bad ka Tripura bad ka Mizoram, u Rajnath u la kyntu ia ki myntri rangbah ban ia pynbeit da kaba iasngewthuh jingmut lang bad ban nym pynmih kano kano ka jinghuri huri.
U la ong ba na ka liang ka sorkar pdeng kan ai ia ka jingiarap ia ka jingthmu jongki ban pynbeit ia u pud u sam bad tangba ia mynta katba bym pat lah ban pynbeit, dei ban pynneh shwa kumba ka long.
U myntri pohiing u la ong ruh ba ka jingpahara ia ka khappud ka dei ka kam kaba kongsan eh bad kyntu ia ki myntri rangbah ban pynsted ban pynioh jaka ban pyndep noh ia ka jingker sainar ha khappud.
U la ong ba ka tnad kan sa mang pisa ban buh ia kawei ka NDRF ban peit bad ai jingiada ia ki briew namar ba kane ka thain ka dei ka lynti iaid jong u jumai bad kyntu ia ki myntri rangbah ban pynkhlain ia ka rukom treikam jong ka State Disaster Response Force.