Kynthah ka Congress, ba Miss Call ka BJP

Shillong, 17 Iaiong:
Ka Indian Youth Congress ka la kynthah ia ka jingpynrung dkhot ka seng BJP da kaba phah ia ki paidbah ban ai miss call ha u nombar ba katei ka seng ka la buh. Ka kyrwoh na u President ka Youth Congress u Richard Marak, ka la ong ba kane kam dei ka jingpynrung dkhot, hynrei ka dei tang ka jingpynrung Miss Call, ban ialam bakla ia ki paidbah, u la ong ba tang da kaba ai miss call kam lah ban pyni ia ka jingkhlain jong ka seng. U Richard u la ong ba lada khein ia ki Miss Call ha u nombar ka seng BJP ki dkhot ki la kot sha ka 9 klur ngut tam, kaba mut ba katei ka seng ka la kham heh ban ia ka Communist Party kaba don ha ka ri China, ka seng kaba buntam ki dkhot na ki seng sain pyrthei kaba don ka jingbun briew haduh 8.6 klur ngut ki dkhot. U Richard u la ong ba ka BJP ka lah ban sngew khyllew halade ba la don bun ki Miss Call hynrei kam tip pat ba uwei u briew um shym la bat tang kawei ka mobile. Utei u nongialam ki samla Congress u la kynnoh ruh ba katei ka jingleh ka BJP ka dei ka bamsap kaba shyrkhei tam.
Lah ban kdew ba ka BJP ka la pyllait paidbah ia u nombar 18002662020 ha ka 1 tarik u naiwieng, 2014, kaba mut ba kito kiba kwah long dkhot hapoh katei ka seng ki lah ban long ki dkhot marsien ai miss call sha utei u nombar, la pyllait paidbah ia utei u nombar da u myntri rangbah duh ka ri u Narendra Modi uba long ruh u dkhot ba nyngkong tam ka BJP da kaba ai miss call sha utei u nombar.