Kyntait u SMR, ïa ka jingmih ka jaitbynriew ‘High Level’

Shillong:U Symbud Myntri Rangbah ba khmih ïa ka Tnat kam Pohïing (Police) Bah Prestone Tynsong, mynta ka sngi ba ar, ula kyntait ïa ka jingkynnoh halor ka jingmih ka jaitbynriew riewlum “High Level” haba pyntip ruh ba ka Sorkar kan sa shong bishar ïa ka jingbatai ba la aiti da ka Tactical Team-I, kaba leit khyn ra ïa ka Ïingsah u Nongïalam barim ka HNLC (L) u Bah Cheristerfield Thangkhiew, kaba lam sha ka jingïap jong u ha ka 13 tarik Nailar 2021.

“Lada phi lah ban sei ïa ka sakhi da ka jingthoh, hynrei kan shu long tang kaba mih na ki rym miang shyntur bad ka jingkwah kren pyr shah hynrei ka Sorkar kam pdiang ïa kum kine ki jingkren ba ngi donkam ban pynkha sa kawei ka Jaitbynriew riewlum ha Meghalaya,” ong u Bah Prestone haba jubab ïa ka cut motion ba la wanrah da ki arngut ki Dkhot ka Liang Pyrshah u Bah Ardent M Basaïawmoit (VPP) bad u Dr Celestine Lyngdoh (Congress) ha Ïingdorbar Thaw Aiñ.

Haba pynpaw ba kyntien ‘High level’ ka mih ha ki ïew ki hat, u Symbud Myntri ula ong, “Ha katei ka por haba nga long u Nongaiktien ka Sorkar MDA, nga ju pynshai da kaba ong balei ba phim wanrah ïa kita ki dkhot ka High Level bad balei ba phim ujor ejahar pyrshah ïa ki dkhot kata ka High Level”.
Halor ka jinglong jingman jong ka kam ba ïadei bad ka jingkynnoh siat ïap ïa u Bah (L) Cheristerfield Thangkhiew, u Bah Prestone ula ong ba ka Sorkar ka dang shu ïoh pdiang ïa ki jingbatai na ka kynhun Tactical team-I ha kine ki khyndiat taïew ba la leit noh.

“Mynta ka Sorkar kan sa shong bishar ïa ka jingbatai. Kam dei kaba ngi kwah pynslem ïa ka kam hynrei ai ba ngan kular ïa ki dkhot ka Ïing ba kane ka kam ba sahteng kumba la ai jingmut da ka Inquiry Commission, ka Sorkar kan sa shim ïa ki sienjam katkum ka lynti kaba dei,” ula bynrap.
Haba ïadei bad ka hukum ka Ïing kashari Meghalaya High Court ban phah pahara da ka CISF na ka bynta ban tehlakam ïa ka jingkhaï? tuh ïa u dewiong ha Jylla, u Symbud Myntri Rangbah ula ong, “Ai ba ngan pynshai ba lada phai sha ka jingtreikam ka tnat Pulit, ngi la lah ban tehlakam. Ngan ym kren than ïa ka hukum ka Ïingkashari, hynrei ai ba ngan kular ïa ka Ïïng ba ki Pulit jong ngi ki la biang lut nadong shadong ban tehlakam ïa kiei kiei hapoh ka Jylla Meghalaya”.

U Dr Celestine Lyngdoh, haba ïashimbynta ha ka jingïatai, ula kyntu ïa ka Sorkar Jylla ban ai laitluid ïa ki pulit ba kin treikam bad ban ailad ïa ki ba kin trei la ka kam.
Haba ïada ïa ka tnat lajong, u Bah Prestone ula ong ba ka Sorkar ka la ai ka kti ba laitluid ïa ki Pulit ban tehlakam ïa kiei kiei baroh la ka dei ka kam bymman lane ka jingshongsuk shongsaiñ lane ka kam ba ïadei bad ka jingshngaiñ ka Jylla haba bynrap ba ka Sorkar kam ju mushlia satia ïa ka jingtrei kam jong ki Pulit.
Halor ki jingeh ba la pynpaw da ki Pulit, u Symbud Myntri Rangbah ula ong, “Ngan sa shong bishar bad ngan sa pule bniah ïa kine kiei kiei baroh namar ngi kwah ban ai mynsiem ïa ka Tnat Pulit baroh kawei”.

Haba phai sha ka jingtreikam ki Pulit katkum ka juk ba mynta, u Bah Prestone ula pyntip ba ma u ha ryngkat ba ka kynhun jong u, kin sa leit ïakynduh ïa ki Ophisar ka Ministry of Home Affairs (MHA) hadien ka Dorbar Mang tyngka ban ïakren kham bniah ïa ki kam ba ïadei bad ka jingtreikam ki Pulit kat kum kane ka juk ba mynta.
Haba u Bah Ardent u kwah ban tip mano ba ai hukum ban siat ïap ïa u Bah (L) Cheristerfield, u Bah Prestone ula ong, “Ngi la dep ban pan jingpynshai na ka kynhun. Ïa mynta ngam lah ban ong mano ba ai ïa ka hukum” haba pynpaw ba ka jingthmu ba nyngkong eh ka long ban kem ïa une u nongïalam barim jong ka HNLC.