Kyntait U Rahul, ban jied ia U President thymmai jong ka seng Congress

New Delhi: Hadien shibnai, ba ula tyrwa ban hiar shuki noh, kum u nongialam jong ka seng Congress, U Rahul Gandhi mynta ka sngi, ual kren shai, ba um kwah satia ban don bynta ha kaba jied ia U President thymmai jong ka seng. “Ngam kwah ban jied ia uwei pat, u ban long U President jong ka seng” ong U Rahul Gandhi.

U Rahul, ula kyntait ruh ban long nongialam ia ka seng Congress ha Lok Sabbha, ha kaba katei ka seng, ka hap ban jied ia U Adhir Ranjan Chowdhury, U MP uba na West Bengal. Ka jingthmu jong U Rahul, ban hiar shuki noh, ka dei hadien ba ka seng Congress, ka la rem kput ha ka elekshon MP ba dang shu dep, ha kaba katei ka seng, ka ioh tang 52ngut ki MP ha Lok Sabbha bad wat ialade ruh, ula shah rem ha ka jing iakhun pyrshah ia ka Smriti Irani ha Amethi.