Kyntait u myntri, ba ieh jyndet ka kompeni ia ka 4Lane

Shillong, 2 Naitung:
U myntri ka tnad PWD u Bah Sniawbhalang Dhar u la kyntait ba ka kompeni ba pyntrei ia ka surokbah Four Lane ka la shu ieh jyndet ia ka kam.
U Bah Sniawbhalang u la ong ba ka long kaba bakla ban ong ba ka jingtrei ia kane ka surok NH-40 na Jorabat sha Umiam ka la sangeh noh hynrei ha kajuh ka por u la kubur ba ka long kaba suki.
“Ka long kaba shisha ba ka jingpyntrei ia kane ka surok mynta ka long kaba suki. Ngi khmih lynti ba ka jingtreikam kan sa sdang sted ha ki taiew ban wan namar ba ka NHAI ka la dep pynthikna ba ia kane ka projek yn pyndep hapoh u Lber 2014” la ong u Bah Sniawbhalang ha ka jingiakynduh bad ki nongthoh khubor hynne ha ka sngi Hatmajai.
U la ong ba kawei na kid aw na ka bynta ka jingbym hun ia ka jingtreikam kumba la kam da ka NHAI ka dei ka jingmih ka huri hura halor ka jingpyniaid ia ka surok ha ka thain Umsning Bypass.
“Wat haduh mynta la don ka jingiapher jingmut hapdeng ki paidbah la yn pyniaid ia kane ka surok na kaba la don lypa ne yn pyniaid na kaba thymmai. Nga kyrmen ba kane ka jingeh yn sa weng noh shen” la ong u myntri ka tnad PWD.
Haba kylli la ka don ne em ka jingpynshitom ia ka kompeni kaba pyntreikam ia kane ka surok lada kam lah ban pyndep ha ka por kaba la buh, na ka liang u myntri u la iathuh ba um lah ban ong ei ei halor kane namar ba ia kane ka surok la peit da ka sorkar kmie.
Ka jingsngew khia jong ngi ka long beit ban pyndep kloi ia kane ka surok” la ong u Bah Sniawbhalang bad bynrap ba ka NHAI ka la kam ba haduh 30-40 percent ka jingpyntrei la dep haduh mynta.
Ha kajuh ka por u Myntri Rangbah ka jylla Dr Mukul Sangma u la pynpaw ia ka jingsngew skhem ba kane ka projek yn sa lah ban pyndep ha ka por kaba biang lashem snem.
“Ngam iohi ei ei ba kan don jingeh ban pyndep ia kane ka projek ha ka por kaba biang. Nga la bthah ia ka NHAI ban pyrshang ban pyndep ia kane ka prpjek ha ka por kaba la buh”, la ong u Myntri Rangbah hadien ba la pynlong ia ka jingialang bad ki heh ka National Highway Authority of India (NHAI) halor ka jinglong jingman jong kane ka surok.
Ia kane ka surok la sdang trei naduh u snem 2010. Ka don 62 km naduh Umiam sha Jorabat bad la ioh pyntrei da ka kompeni Ms Ramky ha ka jingmang pisa kaba T. 536 klur.