Kyntait U Lamphang ban iakren, ba shah leh beijot ka sister

Shillong, 18 Lber:
U Lamphang ka iing dorbar thaw ain ka jylla u AT Mondal hynne ka sngi Palei, u la kyntait ia ka Zero Hour Notice ba la wanrah da u MLA ka NPP u James K Sangma halor ka jingshah leh beijot jong ki sister ha jylla West Bengal kaba dang jia shen.
Haba kyntait ia kane ka Zero Hour, u Lamphang u la ai daw ba katei ka jingjia ka long shabar ka jylla jong ka Meghalaya bad namar kata, ym lah ban pdiang ia ka jingiatai hapoh ka iing dorbar thawain ka jylla.
Namar kane ka jingkyntait jong u Lam phang ban nym ailad ban iakren ia kane, na ka liang ka jingthmu jong u James K Sangma ban iakren ia kane ka mat hapoh ka iing dorbar ka la kut noh.
“Ka dei ka jingjia ba sngewkhia hynrei ka jaka ba jia ka long shabar ka bor jong ka sorkar jylla bad namarkata, nga kyntait ban pdiang ia kane ka Zero Hour”, la ong u Lamphang.
Lah ban kdew ba ki runar ki la leh beijot ia kawei ka sister ha jylla West Bengal kaba la 60 snem eiei ha katei ka jylla kaba la pynkhihwin ia ka ri bad khamtam ia ka jylla West Bengal halor kane ka jingjia pohjait ba la leh da ki riew pohjait.