Kyntait u kyrtong Congress, ba ula ioh bam pisa na ka seng BJP bad u ong “Mano ba nud ban tyrwa ia u briew, uba tang ka baje ka shongdor T.15lak”

Indore: U Akshay Kanti Bam, ula weng noh ialade, kum u kyrtong jong ka seng Congress na Indore bad ula pyniasoh ruh ialade sha ka seng BJP.

Lyngba katei ka rai jong U Bam, ha ka 29tarik Iaiong 2024, ka la pynkut noh ia ka jingialeh pyrshah jong ka seng Congress, ia u kyrtong BJP na Indore, U Shankar Lalwani.

U Bam, u kyntait ruh, ba ka jingleit rung jongu sha ka seng BJP, ka dei kaba la dep ia pynbeit lypa. Haba jubab sha ki kotkhubor, U Bam, ula ong “Kaei kaba nga don bad kaei kaba ngam don, ka la paw lut tyngkrein ha khmat uba bun. Mano shuh hi ban don ba nud ban ia tyrwa pisa ia u briew, uba tang ka baje jongu, ka shongdor haduh T.15lak” da kaba u kren kob, ia ka baje remdor kaba u deng, haba iathuh ha ki kotkhubor, ha Alirajpur ha ka sngi hat majai ba ladep.