Kyntait u EM, ba ai wai sop sop ia ka khyrdop ha Mawiong

Shillong, 7 Nailur:
U Executive Member ba peit ia ka Iew ka Hat ka Khasi Hills Autonomous District Council ( KH ADC) u Bah Donkupar Sumer u la kyntait ia ka jingkynnoh ba u la shu ai wai sop sop ia ka khyrdop khrong khajna ia ka Iew Dielang ne ka Mawiong Regulated Market ha Mawiong kumba la paw ha ki lad pathai khubor.
U Bah Sumer u la ong ka jingkynnoh kam dei kaba shisha namar u la iakren shwa bad u CEM ka KHADC shwa ban ai wai ia katei ka khyrdop.
U la ong ba u CEM ka KHADC u Bah Ardent M Basaiawmoit u la ong ba ia ka jingaiwai kaba long palat ia ka T. 5 lak ba dei ban khot da ka tender’ bad ia kaba hapoh ka T. 5 lak pat ban shu khot beit ia ki parti. U Bah Sumer u la bynrap ruh ba ka Synroplang Mawlai Constituency Self Help Group ka la tyrwa ialade ban shim wai ha ka dor T. 2.55 lak ha ka shi snem hynrei kam shym la ioh satia.
Kum ban shu pynkynmaw ba ka la don ka jingkynnoh ba ka KHADC lyngba ka tnad ka Iew ka Hat ka la aiwai ia ka khyrdop khrong khajna ia ka Iew Dielang ne ka Mawiong Regulated Market ha Mawiong ha uwei u riew shimet khlem da khot jingpynbna eiei. Katkum ka jingtip ba la ioh, ia kane ka khyrdop la ai ha uwei u rangbah uba la tip kyrteng kum u Joflin Marbaniang na Mawlai Umthlong ha u Naitung mynta u snem.