Kyntait U DHS, ba ka Jylla, ka pynbun kiba ioh covid, ban ioh bun pisa na Delhi

Shillong: Hadien ba la iohi ia bun ki jing kynthoh jong ki paid bah halor ka jingbun ki positive case ha ka jylla; na ka liang u DHS jong ka Jylla u Dr. Aman War, u la pynpaw ba ka long ka jingsngewthuh bakla bad kaba pynialam bakla ia ki paidbah bad halor ka jing kynnoh ba ka health department ka pynpaw ia bun ki positive case, tang ban ioh pisa shibun na ka sorkar kmie, ka long ka bym shisha bad kane baroh ka dei tang ka khana thok bad ka khana shukor tang ban pynbudnam ia ka sorkar bad ia ka health department khamtam ia ki nongtrei jong ka koit ka khiah.

Haba iakren bad ki lad pathai khubor mynta ka janmiet, u Dr. Aman War, u la ong ba na ka liang jong ka health department kam don kum kata ka jingmut bad ki long tang ki jingpynthoh bria ki briew ban shim kabu ban ong ba ki ioh pisa katba dang bun ki positive case.

“Ngi ruh ngi don ka jingsngew, ngi trei shitom ban lah ban pynjah ia kane. Lada ngi pynioh positive case tang ban ioh pisa, kane ka la dei ka jingbakla na ka liang ka jong ngi” u la ong.

U la iathuh ruh ba ki jing kynnoh, ba haba ki mih ki case ba thymmai, bad ki nang ioh ka pisa, kane ka long kaba bakla shibun namar ym shym la don kum kata. Ka la don ruh ka jingpharep thok ba ki doktor bad ki nos ba sumar ia ki nongpang covid ki ioh ia ka buskit haba nang bun ki positive case.

Na ka liang u Dr. Aman War, u la kyrpad ia ki paidbah ba kim dei ban ngeit thala ia kine ki khana thok jong ki briew namar kan wanlam ia ka jingkulmar hapdeng jong ki bad u la ong ruh ba lada ki paidbah ki kwah ban kren ia kane, ki lah ban leit iakynduh lade ia ki heh ka health department khnang ban ioh ia ka jingpynshai.

Haba kylli la kin ai da ka ejahar halor kine ki khubor thok, na ka liang u DHS, u la ong ba ia mynta un pynbna shuwa lyngba ka lad pathai khubor hynrei lada ki dang don kiba kynthoh bad kiba pynthoh bria hadien yn pynngat ia ki ha ka Epidemic Act namar kane kam dei kaba bha ban pynbna ia kum kine ki khubor.