Kyntait U Chairman bad ki heh NEEPCO ban ia kren ia ki KSU

Shillong,
12 Rymphang:
Ka Khasi Student Union (KSU) Saphai Unit mynta ka sngi Palei, ka khlem iakynduh ia u Chairman ka NEEPCO, Shillong, ban ai ha u ia ka dorkhast kaba ka NEEPCO ka la kular ban wanrah kam pynroi ia ka shnong Iooksi bad Saphai lah phew phew snem mynta.
U President ka KSU, Saphai Unit, samla B.Suchiang, u la ong ba ka seng ka la dep ban buh sngi bad u Chairman ka NEEPCO mynta ka sngi, hynrei ha ka jaka ban iakynduh ia u, ka seng ka la iakynduh noh ia u Managing Director, u P. Bordoloi hynrei ka liang jong u pat, u la phah kylla ia ki sha u General Manager u A.Kumar bad une ruh u la kyntait ban iakynduh ia kitei ki dkhot ka seng.
Hadien jong katei, ki dkhot ka seng ki la ioh lad ban iakynduh noh ia u General Manager, Township, NEEPCO, Shillong, u S. Chakraborty bad aiti ia ka dorkhast ha u bad na ka liang jong u, u la kular ban aiti bad pynpoi ia ka dorkhast kaba ka seng ka la wanrah sha u Chairman ka NEEPCO.
Kane ka jingleh jongki ka la pyntharai sniew ia ka seng ba imat ka don kaei kaei sha lyndet bad namar kata, u GM um kwah ban iakynduh ia ki.
Ka daw ba la pynlong ia ka KSU, Saphai Unit ban leit iakynduh ia utei u khlieh ka NEEPCO, ka long halor ka Kupli Hydro Electric Project, kaba don hajan kitei ki ar tylli ki shnong bad ban kyrpad na u ban plie lynti ia ki nongshong shnong kitei ki ar tylli ki shnong ha kaba iadei bad ka roi ka par bad ka kam ka jam na ka bynta ki samla kumba ka NEEPCO ka la kular ia kane lah phew phew snem mynta.
Katei ka ‘Hydro Project,’ ka la ktah shi kat dei eh ia ka jinglong jingman ki briew jong kine ki ar shnong (Iooksi bad Saphai) namar ki la duh ia ka jaka rep jaka riang da ka spah akar ba kynthup ruh ia ki ‘law kyntang bad ruh ka jaka jngoh kai kaba la tip kum ka ‘Umshit.’
U Bah L.Tariang General Secretary, Laskein Circle, ka seng ka la wan ban iakynduh ia utei u Chairman ban pan jingiarap ia ki nongshong shnong kumba la kular da ka NEEPCO ha kaba iadei bad ka roi ka par ba kynthup ha ka liang jong ki skul, ki jaka sumar, ka bording, ka umbam um dih, bad khamtam ia ka kam ka jam na ka bynta ki samla kitei ki ar tylli ki shnong.
U la iathuh ruh ba kaba sngewlyngngoh ka long ba balei kitei ki ar shnong kim pat ioh jingiarap eiei ha ka roi ka par hynrei ka NEEPCO ka la theh ia kiba bun ki jingdonkam sha ka shnong Dima Hasoa jong ka Assam la ka long ha ka liang ki skul, ki jaka sumar bad kiwei kiwei.