Kyntait U Bah Shylla ka shuki Deputy CEM, lah ban poi sha U Bah Adelbert

Shillong, 26 Jylliew:
Ka sain pyrthei ha Khasi Hills Autonomous District Council (KHADC) ka dang khih phaloh bha mynta namar ba u CEM u Bah Pyn shngain N Syiem u dang pyrshang ban pynskhem ia ka EC jongu da kaba ai shuki ia kiba kyrshan dohiap ia u ha kane ka jingpyrshang pynkhyllem ha ka dorbar ba dang shen.
Kat kum ka jingtip, u Bah HS Shylla uba dei u radbah ban pynlait im ia ka EC jong u Bah PN Syiem ula kyntait ia ka jingtyrwa ia ka shuki Deputy CEM namar ba u kwah ba ka EC ka PDF kan skhem. La iathuh ba u Bah Shylla u la sngew hun tang ba la neh ka shuki jong u Bah PN Syiem namar ba um sngew wit shuh ha kaba iadei bad ka jingwanrah ia ka MDC skhim kumba long myn shwa ha ka por ba u dang don ha ka liangpyrshah ha kaba u la shah pyndik ha ka EC jong u Bah PN Syiem.
Ka tyllong khubor ba iohlum, la iathuh ba namar kane ka jingbym treh jong u Bah Shylla ia kane ka shuki, la ioh jingtip ba u Bah PN Syiem u la lah ban tyrwa noh ia ka shuki Dy CEM ha u MDC ka KHNAM u Bah Adelbert Nongrum uba dei uwei uba kyrshan ia ka EC khamtam ka jingpep jongu ha ka sngi iatynjuh bor, kaba la iarap ia ka PDF ban lait im da ka said na ka jingkhyllem. Ha ka jingiatynjuh bor dang shen ha iing dorbar, ka EC la PDF ba ialam da u Bah PN Syiem ka la lait salit na ka jingkhyllem  hadien ba u MDC ka KHNAM u Bah Adelbert Nongrum u la pep dorbar, u MDC ka UDP na Mairang u Bah Equator L Nongrang bad u MDC ka HSPDP na Mawthadraishan u Bah Blandingstar Warjri uba wan mih kynsan hadien ba la kut dorbar hadien ba u la pep dorbar baroh shi taiew.