Kyntait U Bah Pynshngain ba phah kyrshan ia ka Kong Fenela

Shillong, 09 Naiwieng:
U Chief Executive Member (CEM) ka Khasi Hills Autonomous District Council (KHADC) u Bah Pynshngain u la kyntait ia ka jingmih ka khubor hamsaia ba u phah kyrshan ia ka kyrtong shimet ka Kong Fenella L Nonglait ha kane ka elekshon shiteng samoi na Nongstoin.
Ka Kong Fenela ka la rai ban iakhun kum ka kyrtong shimet ha kane ka elekshon shiteng samoi hadien ba ka la shah pynduh tiket ha ka HSPDP.
Haba iakren mynta ka sngi Nyngkong, u Bah Pynshngain u la ong ba ka jingmih khubor ka dei ka bym shisha satia bad ka dei kaba shu mih ban ialam bakla ia ki paitbah.
“Em phi, kam dei kaba shisha, ka jingmih khubor, ka dei kaba bakla”, la jubab u Bah Pynshngain haba kylli hato ka dei shisha ba u phah kyrshan ia ki nongialam shnong ia ka Kong Fenella ha kane ka elekshon.U Bah Pynshngain u dei u MLA ba ialeh pyrshah ia u Myntri Rangbah ka jylla u Dr Mukul Sangma watla ki dei na kajuh ka party.
Ka khubor ka iathuh ba u kyrtong ka Congress ha kane ka elekshon shiteng samoi na Nongstoin u Bah Gabriel Wahlang u dei ba iajan bha bad u Myntri Rangbah ka jylla bad na kata ka daw, u Dr Adviser Pariong um shym la ioh tiket namar ba um don ka jingiajan bad ka kynhun jong u Myntri Rangbah ka jylla.Kiba bun ki iakren ba imat u CEM um sngew tynnad ban kyrshan ia u Bah Gabriel namar ba u dei u briew jong u Myntri rangbah ka jylla.
U Bah Bah Gabriel uba shah sieh kum MDC ka KHADC, u la iehnoh ia ka kam hadien ba u la ioh tiket ban iakhun ia ka MLA ha kane ka elekshon shiteng samoi na Nongstoin konstitwensi kaban long ha ka 21 tarik Naiwieng.