Kyntait U bah PK Shullet, halor ki jing kynnoh bapher, ha ka tnat MeECL

Shillong:U bah PK Shullet, U President jong ka CCORMUA, myn hynnin ka sngi u la pynpaw ia ka jingsngewkhia hadien ba u la shah kynnoh bad shah pharep ha kiba bun rukom ha ka ba u la iathuh ba u la rai ban hiar shuki noh kum u President jong ka seng.

Haba ia kren bad ki lad pathai khubor, na ka liang u bah Shulletm u la ong ba ka jingkynnoh pyrshah ia u, ka long ka ba phylla namar ba ka mih hadien ba dang khyndiat sngi, hadien ba ka seng kaba u bah Shullet u la ialam ka la mih pyrthei ban ia khun ia ka kam bamsap hapoh ka MeECL.

U la pynshai ruh ba kine baroh ki jingkynnoh pyrshah ia u ki dei ki bym don nongrim, namar kat kum ka jingkynnoh ia u ka long ba u la ai tender ia ka IS enterprise katba na ka liang jong u, u la pynshai ba um shem la don jingtip eiei ia kane ha ka ba ia kine ki tender la ju pynbna lyngba ki website.
Haba ia dei bad ka jingkynnoh ba la thung kam ia u para jong u, U Nidaman Shullet, na ka liang u bah PK Shulet u la ong ba um dei u para jong u, hynrei ki dei tang na ka juh ka jaid bad u la pynshai ruh ba ka jingpynrung kam la leh da ka DMC bad u dalade um donbor eiei. Haba ia dei bad ki jingpynlut jingsep ruh, ia ki jingkhein ba la leh da u Chartered Accountant.

U bah Shullet u la ong ruh ba ka jingkynnoh ba u la thung ia kawei ka longkmie kum ka specialist ha katei ka jaka ha kaba u bah Shullet u la ong ba um ithuh ia kane ka long kmie bad ka kurim jong u kam trei ha katei ka jaka bad u la iathuh ruh ba ka jingkynnoh ba kiba ha ing jong u ha ryngkat ka jingdonkti jong u, ki la supply ia ki tiar sha ka MeECL Ms IS Electrical ha ka ba u la pynshai “Nga la wan wad jingshisha sha Management electrical jong ka MeECL ha ka ba u la lap ba ka trai jong kane ka Ms IS electrical ka dei ka kong Indira Slung bad ngam ithuh satia ia i.” Ula pynshai ia baroh ki jingkynnoh pyrshah ia u ki long ki bym don nongrim, hynrei kine baroh ki jingkynnoh ki la ktah ia ka burom jong ka CCORMUA bad mynta ka sngi u la rai ba yn iehnoh noh ia ka kam president jong ka CCORMUA.

U la iathuh ruh ba haba ia dei bad ki jingkynnoh pyrshah ia u, u la pan da ka RTI na ka ophis jong ka ophis jong ka MSDA ban ioh ia ka jingshai halor ki jingkynnoh pyrshah ia u ha dien ba u la ioh ia ki jubab na katei ka ophis un sa shong pyrkhat la un ujor sha iing kashari.