Kyntait thoh khubor halor ka mang tyngka ka KHADC

Shillong: Ki Nongthoh khubor ka Jylla myn hynnin ka sngi, ki la rai ban kyntait ban thoh khubor halor ka mang tyngka jong ka Khasi Hills Autonomous District Council (KHADC) namar ka jingbym lah jong ka Council ban pynbiang ia ki kot ki sla ba iadei bad ka mang tyngka.
Ka KHADC kala wanrah ia ka mang tyngka jong ka Council mynta ka sngi nyngkong kaba dei ka sngi sdang jong ka Dorbar Mang tyngka bad ia kane ka mang tyngka la wanrah da u Deputy Chief Executive Member (CEM) Bah Pyniaid Sing Syiem.
Ki Nongthoh khubor kiba ju leit lum khubor ia ka Dorbar jong ka KHADC hynne ka sngi kila sah ha ka umdum namar ka jingkyntait jong ka Council ban ai ia ki kot ki sla ba iadei khamtam ka jingkren maitphang jong ka Mang Tyngka (Budget Speech) ka bym pat ju jia mynno mynno ruh.
Ha ka jingshisha, la ju ioh lypa ia ka kopi jong ka jingkren maitphang halor ka mang tyngka ban ioh pule bad buh dak ia ki mat kiba donkam hynrei ha ka sien ba nyngkong, la kyntait ban ai da ki nongtrei ka Council wat hapdeng ka jing leit pan bad jingpynsngewthuh ia ki.
Ki Nongtrei ka District Council ki la kyntait ban ai ia ki kot ki sla halor ka jingkam ba kim pat lah satia ban ai ia ki kot ki sla katba ym pat wanrah ia ka mang tyngka hapoh ka Iingdorbar.
Watla ki Nongthoh khubor kila pynshai ba ka jingdonkam jong ki ka long tang ia ka jingkren maitphang ia ka mang tyngka (Budget Speech) ym ia ka Budget Book, hynrei ki Nongtrei ka Council kim shym la pynsngap satia.
Ym kumba long ha ki Dorbar jong ka Iingdorbar Thaw Aiñ ka Jylla, ha KHADC ka jingpynbiang iaki kot ki sla na ka bynta ki Nongthoh Khubor ka long kaba dkoh haduh katta katta bad bunsien ki Nongthoh Khubor kim ju ioh satia ia ki kot ki sla ha ka por kaba biang.
Haba nujor bad ha Iingdorbar Thaw Aiñ ka Jylla, ki nongtrei jong ka Iingdorbar ki shim ia ka kam ban pynbiang ia ki kot ki sla haduh ha shuki shong jong ki Nongthoh Khubor bad ia kine ki kot ki sla ruh la pynpoi hashuwa jong ka por ban sdang ka jingiatai kynthup ruh wat ia ka Budget Book.
Na ka liang ki nongthoh Khubor ki la rai ba lada ka KHADC ka dang bteng ban nym pynbiang ia ki kot ki sla, ki lah ban nym thoh eiei shuh halor kane ka Dorbar ba mynta.