Kyntait thep vote MP ka Maweit ba kynmaw ki kyrtong tang elekshon

Shillong, 6 Iaiong:
Lai tylli ki seng bhalang na ka thain Maweit ka West Khasi Hills kynthup ka Nongtre Lyngngam Achik Youth Federation (NLAYF), ka Federation of Khasi Jaintia & Garo People (FKJGP), Maweit Circle bad ka Western Youth Welfare Council (WYWC) Maweit Circle ka la rai ban nym iashim bynta ban iathep vote ha kane ka elekshon MP.
Ha kajuh ka por, ki la kyntu ia ki paidbah ba kin iasnohkti lang ha kane ka lynti ban pynpaw pyrshah ia ka jingkynmaw ki kyrtong, ka sorkar ia katei ka thain tang ha ka por elekshon.
“Ngi kyntu ruh ia ki paidbah ba kim dei ban tieng ne riej ia ka jingkren pyntieng kohtympan jong ki bor pyniaid District kiba la pynmih syndon wat da kata ka hukum ban kem naphang bad pynngat ha ka kyndon ain 171c. jong ka IPC bad ban set phatok shi snem ryngkat ka kuna kaba heh ia ki briew kiba pynwit ha ka sngi leit thep Vote”, la ong u Bah Ricky J. Umiong na NLAYF, Bah Ioanis Diengngan na WYWC, Maweit Circle bad Bah Anthony Umiong na FKJGP, Maweit, Circle haba kren ha kane ka sngi Saitjain bad ki nongthoh khubor ha ka nongbah.
Kine ki lai seng ki pynpaw ruh ia ka jingsngew diaw halor ka jingkren pyntieng kohtympan jong u DEO ka West Khasi Hills uba la kren beit tang ia ka thain Maweit kaba shah iehbein hakhmat ka sorkar Jylla bad ki nongmih khmat mynta la 42 snem tam ha baroh ki liang bad kham tam ia ka surok Nongstoin-Maweit kaba jngai tang 36km.
“Ngi kyntu ruh ia u DEO ba un phai lem sha kiwei pat ki bynta jong ka West Khasi Hills namar ka jingsniew kam dei tang ha ka thain Maweit, bad imat kane ka jingleh jong ki bor ba halor ka la leh thik kumba long ha ka Ri Iraq ha ka por ba synshar u Saddam Hussein, kaba mut ba kat kaba ki briew ki dawa ia ka hok kin shah kem bad shah bom naphang”, ki la ong kine ki nongialam.
Ka shi snem ban shong ha phatok ryngkat ka kuna kim pat long eiei haba ngi ianujor bad ki 42 snem tam ki jingeh jingjynjar bad ki jingkordit kiba ngi la mad. Kam pher wat lada ngi shah kem bad shong phatok da ki hajar sien ban ioh ia la ka jong ka hok namar da ki phew ngut ki mynsiem briew ngi la duh noh tang namar ka jingsniew jong ka surok. Balei ngin tieng ia kata ka shisnem ban shong phatok bad ia kata ka kuna? Ngi khlem leh kino kino ki kam pyntriem hynrei ngi dawa ia ka hok ha ka imlang sahlang.
“Katba ngi dang iaid da ka lynti ka ba jai jai hynrei ki bor ba halor ki pynjari pynban da ki kyndon ain bad ka jingpyntieng.
Kumta na ka liang jong ngi, ki lai seng bad ki khun samla jong ka thain ngim salia ban iaid noh da kiwei pat ki lynti ne wat ban kieng atiar noh ruh, lada ki bor ba halor ki iai pynbor ia ngi”, ki la ong kine ki nongialam.
Ki lai seng kumba la dep iaid ban nym iashim bynta ia ka MDC Election kaba la dep da ka lynti kaba jai jai khlem da thaw kino kino ki jingklumar, kumta mynta

ka kynti ruh ngin iaid biang da ka lynti kaba jai jai khlem da khot da kino kino ki jingiakhih hynrei da ka mon ba laitluid la khot ia ki paidbah jong ka thain ban ai ia ka jingkyrshan bad ban iasnoh kti lang.