Kyntait Shad Nongkrem ka Shnong Mawiong & ki paidbah ka Wahkhen

Shillong, 11 Naiwieng:
Ka Dorbar Shnong Mawiong,Diengpasoh Road, Khyrim Syiemship kaba don 150 tylli ki longíing ka la rai ban nym iashim bynta, ia ka jingrakhe lehniam jong u syiem ka Hima Khyrim kaba tip kum ka ‘Shad Nongkrem’ka ban long ha ka 13 bad14 tarik mynta u bnai jong une u snem.
Kane ka rai jong ka shong ka long ka long halor ka nongrim ka jingbympatiaw bad shimkhia jong u syiem ka Hima Khyrim ia ka jingud jingnam ki paidbah ka shnong Mawiong. halor ka jingthmu die duh ka shnong Maw pdang ia ka khyndew ka syiap kaba dei jong ka Ri Raid kaba hap hapoh ka Raid Nongkrem sha ka bor sorkar da ki hajar Acres bad sha ki hehspah shimet da ki spah Acres.
Haba iadei bad kane na ka liang jong ka shnong ka la ujor bad leit iakynduh bunsien ia u khlieh ka Hima u Paiem Balajied sing Syiem , hynrei na ka liang u Paiem u leh bym patiaw ia kane ka jing ud jingnam ki khun ki hajar ka Hima kumta ka shnong kam banse ban shim ia kane ka rai ban nym leit ia shim bynta satia ia ka Pomblang Syiem mynta u snem,ong ka kyrwoh na U bah R.Kharumnuid, Rangbah Shnong Mawiong, Diengpasoh Road, Khyrim Syiemship.
Ha kawei pat ka khubor, la iathuh ba ki paidbah ka shnong Wahkhen, sa shisien biang kila pynpaw ia ka jingbym sngew tynnad ne ka jingbym sngewbha ban leit iashim bynta ha ka shad Pomblang jong ka Hima Khyrim ban long ha ka 13 bad 14 tarik Naiwieng 2013, ha Smit.
Ha ka kyrwoh ba la pynlait mynta ka sngi, u chairman Paidbah Wahkhen u Bah M Khonglein bad u secretary Bah R Buhpohang ki la ong ba ka daw ba ki paidbah ki la rai ban kyntait leit iashim bynta sha ka shad Pomblang ha Smit, ka long halor ka jingbym shim khia u Syiem Khyrim ban pynbeit ia ki jinglong kynrum kynram hapoh shnong Wahkhen kaba la mih na ka jingpynskhem jubor u Syiem ia u Sordar uba la shu thung khlem ka mon ne ka jingpynmynur jong ki paidbah uba bun balang. Ka sur jong u paidbah ka long ba ki kham thrang bad angnud shwa ia u Syiem ban pynbeit shwa ia ka kynrum kynram hapoh shnong khnang ban wanrah biang ia ka shong suk shongsain hapoh shnong ban ia kaban leit kmen leit leh sngewbha sha ka shad ka kmen, katba ki paidbah ki sngew jynjar bad sngewkhuslai hapoh ka jingsynshar shnong synshar thaw.
La kyntu ia ki paidbah ka shnong Wahkhen kiba don kajuh ka jingsngew ban nym iasnohkti lang mynta u snem hynrei kam khang ne mana pat kiba don ka jingthmu da kumwei pat. Kane ka long katkum ka kyrwoh ba la pynlait da u chairman paidbah Wahkhen, Bah M Khonglein bad u Secretary Bah R Buhphang.