Kyntait ki ri Europe, ban ithuh ia ka dawai iada covid, ka covishield

Ki nongleit jingleit shabar ri, kiba na India, wat lada ki la dep injek iada covid ialade, da u Covishield, hynrei kin nym ioh ban rung satia sha ki ri Europe lane kaba ki khot ka European Union’s ‘Green Pass’ ka ban trei kam naduh ka 1tarik Naitung 2021.

Ki ri Europe, ki la sdang ban ai ia ka “vaccine passport” ha kaba ki dkhot jong kitei ki Ri, ki lah ban iaid ban ieng sha la ki kam katba ki sngew dei ban leit bad katei ka passport, ka pyni, ba u briew, ula dep shah injek ban iada na ka khlam corona virus.

Hynrei katei ka green pass, ka pyni, ba ki dawai, kiba lah ban pdiang, kin dei tang kito kiba la mynjur da ki ri Europe bad haduh mynta, ki don saw jait bad kitei kiba la ithuh da ka European Medicines Agency (EMA) bad kitei ki long ka Comirnaty (Pfizer/BioNTech), Moderna, Vaxzervria (AstraZeneca), Janssen (Johnson & Johnson).

U Covishield, uba dei na ka kompeni jong ka AstraZeneca Covid, ba la shna da ka kompeni na Pune, ka Serum Institute of India (SII), um shym dei satia, uba la ithuh da ka EMA, ban pyniaid iew ha ki Ri Europe. Ki Ri Europe, kin pdiang tang ia Vaxzervria, uba dei uwei pat u dawai, uba mih hi na ka kompeni AstraZeneca, tangba u dei uba la thaw ha UK bad ha kiwei ki jaka jong ki ri Europe.