Kyntait ki Pulit Ri Bhoi halor ka jingkynnoh theh Umphniang ha ka Surok NH-6

Nongpoh: Wat la bunsien la ju mih ki jingkynthoh na ki nongniah kali shimet (Private) na Assam bad khamtam eh kito kiba wan teng teng, kiba shait kynnoh ba ki don ki briew kiba ju theh umphniang Diesel bad Mobil ha shilynter ha surokbah NH-6, na ka bynta ban riam bad pynapshrip ia ki kali kiba iaid ba ieng ha ka surok NH-6, hynrei haba pyrshang wad ia ka jingshisha la lap ba katei ka jingkynoh kam don nongrim haei haei ruh, hynrei ka dei ka jingniah thurmur jong ki bad ki bym pat tip bha ia ka jinglong jingman ka surok bad khamtam eh ha ki por slap.

Kawei na ki jaka ba shait kylla ki kali Assam bad kaba la pynlong ia ki paidbah ka shnong Quinine ba kin buh da ki plakad

Dang hynnin ka sngi, u Abdul Hannan, u la pynmih ia ka jingkynthoh ha ka Guahatiplus.com, kawei na ki lad pathai khubor ha Nongbah Guahati bad uba la pynpaw ma u lem bad ka Lok, ki khun, ki la ngat ha katei ka apot kylla kali ha ki thain Umiam, ha kaba u la kynnoh ba katei ka jingkylla ka kali jong u, ka dei tang namar ka jingtheh umphniang Diesel bad Mobil ha surok, ia kaba la leh da ki riew shimkabu.
Haba iakren bad u SP ka Ri Bhoi, u Bah C. Syrti, u la ong ba katei ka jingkynnoh ka dei ka bym don nongrim haei haei ruh.
U la ong ruh, ba lada ka don shisha kita ki briew kiba theh Diesel ha Surok, ym tang ki kali na Assam ki ban kylla, hynrei wat ia ki kali na Meghalaya ruh kan long kumjuh bad kaba kham sngewlyngoh eh hangne ka long ba kito ki kali kiba shait kylla ki dei ki kali jong ki riew shimet na Assam bad kiba ju kylla ha ka por ba jaw slap.
Kham mynshwa ki nongniah kali na Assam, ki la kynnoh ba ki briew ha Quinine ki la theh da ka umphniang Diesel bad Mobil ha surok, tad haduh ba ka la pynbitar shiaktdei eh ia ki paidbah ha katei ka shnong bad kaba la pynlong ia ki ba kin iamih paidbah ban pyrshah halor katei ka jingshah kynnoh bad pynbudnam sniew ia ka shnong.
Lah ruh ban pynkynmaw, ba hadien ba la mih kaba kum katei ka jingkynnoh, ka la pynlong syndon ia Dorbar shnong Quinine hi ba kan kyntait ban iarap, lada jia kino kino ki jingjia kylla kali hapoh u pud u sam jong katei ka shnong.