Kyntait ki pulit ia ka jingkam ka HNLC, halor ka jingsiat iap ia U Romeo

Shillong: Ki pulit ka East Khasi Hills District lyngba ka Superintendent of Police ka kong Claudia Lyngwa, ki la kyntait war ïa ka jingkam jong ka seng kieng atiar Hynñiewtrep National Liberation Council (HNLC) ba ka la siat ïap ïa u bah Romeo Lyngdoh, na ka daw ba u long u nongsyntiat jong ki pulit.

          “U Romeo Lyngdoh u dei u nongïarap (overground worker) jong ka HNLC,” la ong ka kong Claudia Lyngwa, SP, East Khasi Hills, ha ka jingïakynduh bad ki nongpathai khubor ka nongbah mynta ka janmiet ha ophis treikam jong ka.

          Ka kong Claudia Lyngwa, ka la pynshai shuh shuh halor kane ka jingkyntait da kaba pynkynmaw ïa ka jingshah kem ki ar ngut ki dkhot jong ka HNLC ha u snem 2016, kiba la pyndonkam da ka kali jong u Romeo Lyngdoh.

“U Romeo Lyngdoh u la kam ïathuh ba um shym don jingtip ei ei ba u nongñiah kali jong u u la pyndonkam ban kit ïa ki dkhot jong ka HNLC. Hynrei ngi tip shai ba u dei u nonglum pisa jong ka seng HNLC,” la ong ka kong Claudia.

Lah ban pynkynmaw hangne ba u bah Romeo Lyngdoh u la shah siat ïap ha phyllaw ïng lajong ha Lapalang, ka shnong kaba don ha khappud jong ka ri Bangladesh, ha ka miet 12 tarik mynta u bnai.

Ka seng HNLC ha ka kyrwoh ba la phah sha ki lad pathai khubor ka la ong ba ka la thwet ïa u bah Romeo Lyngdoh naduh u snem 2008 na ki daw ba u trei ryngkat bad ki pulit kum u nongsyntiat bad ha ka juh ka por u thung briew ban long nongsyntiat ha ka thaiñ khappud bad ba u ïoh ka jingsiew kaba pahuh na ki pulit.

Halor kane, ka kong Claudia ka la ong ba ka seng HNLC ka don ïa ka ktem ha ri Bangladesh kaba don mar syndah bad ka shnong Lapalang kaba don ym palat ïa ka 300 ïng. “Te kan eh aïu ïa ka HNLC ban lap ïa u bah Romeo uba long ruh u rangbah ba paw ha kane ka thaiñ?” la kylli ka kong Claudia da kaba bynrap, “U Romeo u dei u heh saipan uba khaï ha kane ka thaiñ bad baroh ki ithuh ithaw ïa u bad ki ju khot ieid ruh ïa u da u Bah Lieh.”

Ka SP jong ka EKH, ka la ong ba ka daw ba shisha ka dei namar u Bah Lieh u la pyndonkam bakla ïa ka pisa kaba u ju lum na bynta ka seng HNLC, kumta ka seng ka la ai jingsneng ïa u bad ha kajuh ka por ka long ruh ka jingmaham ïa kiwei ki langrut jong ka seng ba kin long kiba husiar.

Katkum ka khubor, la ong ba ïa u bah Romeo Lyngdoh la siat ïap da arngut ki briew kiba la leit kyrsiew ïa u na ïng sah ha ka por 10 baje mynmiet. Kane ka la pynsuba ïa ki pulit ba ki dei ki briew kiba u ithuh, lym kumta un ym plié ïa ka ïng. Kane ka la pynthikna ba ki dei ki briew kiba u don ka jingïadei.