Shillong, 16 Nailar:
Ka Meghalaya and Greater Shillong Progressive Hawkers and Street Vendors Association (MGSPHSVA) bad ka Thma U Rangli-Juki kala kyntait ia ka ain die madan ka sorkar ka Meghalaya Street Vendors (Protection of Livelihood and Regulation of Street Vending) Act, 2014 bad ki la dawa ba ka sorkar jylla ka dei ban shu bsuh ia ki juh ki kyndon kumba la leh ha ka ain ka sorkar pdeng ia ki nongdie madan.
Kine ki ar kynhun ki la phah ruh ia ka jingthoh sha u Myntri Rangbah ka jylla u Dr Mukul Sangma lyngba ka tnad pynroi sor ha ka 23 tarik Jylliew mynta u snem ban pynkhlain ia ka ain jong ka sorkar jylla kaba long kumjuh kum ka ain jong ka sorkar pdeng bad dei ban pyntreikam ruh wut wut ha kane ka jylla.
Kane ka jingkyntait jong ki nongdie jingdie madan ka long namar ba ki la lap ba ki kyndon jong kane ka ain ka sorkar jylla ka long pyrshah ia ka nongrim jong ka riti synshar ka ri.
Haba kren sha ki nongthoh khubor mynta ka sngi ha nongbah, ka nongialam ka TUR ka Kong Angela Rangad ka la ong ba hadien ba la ioh jingtip na ka RTI la lap ba ka la don ka jingleh bymsuidniew ka sorkar jylla bad ka bym long katkum ka nongrim ka riti synshar ka ri.
“Ha ka 23 tarik Jylliew, 2016, ngi la aiti ia ka dorkhas sha u Myntri Rangbah lyngba ka myntri tnad sor ha kaba iadei bad ka jingeh jong ki nongdie madan bad ki jingdkoh ka ain Meghalaya Street Vendors (Protection of Livelihood and Regulation of Street Vending) Act, 2014″, la ong ka Kong Rangad bad bynrap ba ha ka jingiakynduh bad ka Kong Ampareen Lyngdoh ka la pynthikna ban bishar ia ki jingeh ba ki nongdie madan ki la ujor.
“Hynrei ka por ka la iaid ar bnai bad ka sorkar kam shym la leh eiei bad ka la thaw beain pynban ia ka Town Vending Committee kaba treikam beain da kaba shim ia ki rai ba long beain”, la ong ka Kong Rangad bad bynrap ba ka seng ka la phah jingthoh sha u Myntri Rangbah ka jylla halor ki kam beain MUDA.
“Ngi la phah jingthoh ruh sha ka tnad Housing bad Urban Poverty Alleviation (HUPA) ka sorkar pdeng da kaba kyntu ban nym ai piisa ia kano kano ka skhim sha ka sorkar jylla ba la pan ia ki nongdie madan namar ba ka Town Vending Committee (TVC) kam shym la leh katkum ka ain jong ka sorkar pdeng”, ka la ong.
Ka la kynnoh ba ka sorkar jylla ka la pan pisa na ka sorkar pdeng ban pyndonkam ia ki nongdie madan hynrei ka la pyndonkam pynban ban shna jaka ieng kali ha Tura.
Ka la ong ba ka sorkar pdeng ka la pdiang ia ka ain nongdie madan ha u Rymphang, 2014 bad ka sorkar jylla ruh khohreh khohreh kala thaw ia ka ain jongka ia kane kajuh ka mat ha ka 10 tarik Naiwieng 2014.
“Ka jingdon ar tylli ki ain ia kajuh ka mat, ka dei ka jingdkoh katkum ka schedule VII ka riti synshar ka ri, ha kaba ka ain ka sorkar pdeng ka dei ban ieng. Ka tnad Housing and Urban Poverty Alleviation ka la pan jingshai na ka sorkar jylla halor kane ha ka 28 tarik Lber 2016 hynrei ka sorkar jylla ka leh bym suidniew ia kane”, ka la ong.
Ka la dawa ba ka sorkar jylla ka dei ban bsuh ia ki kyndon jong ka ain sorkar pdeng ha ka ain jong ka sorkar jylla da kaba ailad 40 percent ban iadon bynta ki nongdie madan ha ka Town Vending Committee (TVC). Ka la ong ba ka TVC ka dei ban pynlong ia ka jingsurbe bad ban ai licenses, ban buh ia ki jaka jong ki nongdie madan ha man ki jaka kynthup ha ki iew, ban ai insurance, ai ram ia ki nongdie madan.
Phi don ban ong eiei?