Kyntait ki kali kamai, ba hiar dor petrol, diesel ba tang T.2, yn iai bteng ki jingiakhih

Shillong: U President ka Meghalaya Joint Action Commitee of Commercial Vehicle (MJACCV), u la iathuh ba wat la ka sorkar jylla ka la rai ban pynhiar ia ka khajna jong ka umphiang da ka T.2 shi liter, hynrei ka seng kan iaid sha khmat ka jingiakhih sangeh kamai.

Haba iakren bad u Rupang, u bah Wandonbok Jyrwa u la ong ba ka jingpynhiar jong ka sorkar jylla ia ka Umphniang T.2, ka dei tang ka kam pynbiej jong ka sorkar jylla ia ki khynnah rit ka seng kan bteng ia ka jingiakhih sangeh kamai kali.
U la ong ruh ba kane kam dei ka jingiakhih ym tang jong ka seng, hynrei ka dei ka jingiakhih jong ki paidbah ha ka jylla, namar lada ngim pyrkhat ia ka jait bynriew, kumba ka sorkar ka la shah ban pynkiew ia ka bai kali ngi la dei ban sangeh noh ka jingiakhih.

“Hynrei lada ngi pynkiew ia ka bai kali, ki dor jong ki marbam mardih ha ka jylla kin kiew lut bad kane kan ktah ia u duk u suk bad ym pat don hi ki sengbhalang ki ban mih shakhmat ban pyrshah ia ka jingkiew ka bam ka dih ha ka jylla bad kane ka jingiakhih ka dei ka ba nyngkong ha ka Ri Khasi Jaintia” u la ong. U la iathuh ruh ba ha ka jingialang mynta ka sngi la shim ia ka rai ba ka seng, kan ym pat sangeh ka jingiakhih lada ka sorkar kan ym pat map ia ka khajna kot kali 50% bad ban map ia ka khajna jong ka Meghalaya Valur Added Tax 25% kaba ki ju lum na ki petrol pump.

“Lada ka sorkar ka pynhiar dor T.2 bad ka pynkiew ia ka tax kali, kane kam don jingmut namar ba wat hapdeng ka jingkhangdam ruh hap ban siew lut ia ka khajna halor tang ban kamai ruh ym ioh. Ngi ieng ha ka nongrim ba ka sorkar kadei ban map ia ka khajna 50% bad pynhiar dor ia ka umphiang 25% ia kaei ka ba ki lum ia ka khajna mynta u la bynrap. U la ong ruh ba ha shuwa ka jingkhang dam ka sorkar ka la shim ia ka khajna 22% katba ka sorkar pdeng ka shim 18% bad kane ka dei kaba heh tam, hynrei hadien ka jingkhangdam wat la ki paidbah ki don hapdeng ka jingeh kaba khraw, hynrei ka sorkar ka pynkiew beit sha ka 31%. U bah Jyrwa, u la ong ruh ba ha ka jingshisha ka sorkar jylla ka la dei ban khot shuwa ia ka jingialang bad ki nongniah kali, hynrei mynta ka la shu shim rai marwei, khlem pyrkhat ia ki paidbah.