Kyntait ka VHP, ba pyrta ia ki kyntien, ba wanrah jing iapher niam

Shillong:Ka seng Vishva Hindu Parishad (VHP) ka burom ïa ka jinglong kyrpang ki trai ri trai muluk bad ka don bynta ban pynneh pynsah bad ban burom ïa ka hok jong ki paidbah ban ngeit ne ban leh ïa kano kano ka jaitniam.

Ïa kane la pynpaw da ka VHP hadien ba ka seng Khasi Students’ Union (KSU) ka la pynrem jur ïa ka jingshim bynta ki dkhot ka VHP ha ka jingïaid paidbah ha kylleng ka nongbah Shillong ha ka 2 tarik mynta u bnai kaba dei ruh ka sngi U Blei.

Lah ban kdew ba dangshen ka KSU ka la kynnnoh ba ka seng VHP ka la pynlong ïa ka jingïaid paidbah bad ha kane ka jingïaid paidbah ki dkhot ka VHP ki la sangeh hakhmat ka ïingmane bad kila pyrta Jai Shree Ram kaba la wanrah ruh ka jingshong syier ki paidbah kiba leit sha ki jingïaseng.

Haba ïadei bad kane, ka VHP ka pynpaw ba ha kane ka jingïaid paidbah kam shym la mih kano kano ka jingklumar namar ïa kane ka jingïaid paidbah la pynlong katkum ki kyndon bad la pynïaid beit ïaid ryntih ha ka jingïatreilang bad ka ophis Superintendent of Police (SP) ha kaba ki Pulit kila synranlang.
Ka VHP ka la pynpaw ba ka jingpyrta Jai Shree Ram kadei ka dustur ha kaba ki riewngeit Hindu ki pyrta kum shi bynta ban burom ïa u Blei ‘Lord Rama’ bad na ka liang ki dkhot ka VHP kim shym la pyrta kino kino ki kyntien ban wanrah ka jingïasngewpher jingmut bad kiwei ki niam.