Kyntait ka Supreme Court ban tuklar, ba khang dewiong ka NGT

Shillong,3 Naitung:
Ka supreme Court ka la kyntait ban tuklar ia ka hukum ka National Green Tribunal kaba la khang pyrshah ia ka jingtih dewiong ha kane ka jylla naduh u snem ba la dep. Ka iing bishar ka la weng ia ka jingkyrpad ba la phah da ka State Co-Ordination Committee of Coal Owners Miners and Dealers Forum ( SCCC OMDF) , Shillong da kaba bthah ia u nongiasaid jong ka ba un weng noh ia katei ka jingkyrpad jong u. Katei ka hukum ka la ong ruh ba la bthah ia u nongiasaid ain jong katei ka kynhun ban un pan jingbit na ka iing bishar ba un leit rah biang ia katei ka mat ha khmat ka NGT, Principal Bench, New Delhi.
Katkum ka jingong ka SCCCOMDF ka la ong ba la pynrung ia katei ka kes hakhmat u Chief Justice ka India ha ka 1 tarik u naitung. “Hynrei ka ing bishar kam shym la pdiang ia katei ka jingkyrpad bad kam kwah ban tuklar ia ka hukum ba la pynmih da ka NGT bad ka la hukum ia ki ba kin leit rah biang ia katei ka mat sha ka NGT” ong ka khubor na katei ka Forum. Ha kajuh ka por u nongsaid ain katei ka kynhun ruh um shym la lah shuh ban pynkohnguh ia ka ing bishar bad u la weng noh ia katei ka jingkyrpad bad u la pan jingbit ban leit rah biang ia katei ka mat sha ka NGT.