Jowai, 15 lyngkot:
Ka mukotduma, ha kaba iadei bad ka jinglum khajna jong ki Dolloi ka Jaintia Hills, kaba la pynmih ia ka jingsngew pyrshah kaba jur jong ka Jaintia District Council, ka la wan ha ka jing ia said ha Supreme Court ha ka 5tarik Kyllalyngkot 2017.
Na ka liang ka JHADC, ka la leit ban ia said, da kaba ka sngew pyrshah, ba ki Dolloi kim dei ban lum khajna satia bad ka Jaintia District Council, ka pynpaw ruh ba ki riewsaid jong ki Dolloi, ki byrngem byrsit ruh ia ki nongtrei jong ka Jaintia District Council, kiba don ha Delhi.
La mihkhmat ia ka JHADC, da U Bah HS Thangkhiew Senior Advocate, katba ia ki Dolloi, la mihkhmat da U Amit Kumar, uba dei U Advocate on Records jong ka Supreme Court of India.
U riewsaid jong ka JHADC, u kam ba ki Doloi, ki lum khajna khlem kano kano ka kyndon bad na ka liang jong u riewsaid jong ki Doloi, u kam, ba katei ka dei katba kum ka bor jong ki Dolloi bad ka Supreme Court, kam shym la pdiang satia ban pynsangeh ia ka jingdawa jong ka JHADC, hynrei ka la bthah ia ki Dolloi, ba kin jubab halor katei ka jing kynnoh jong ka District Counil. U riewsaid jong ka Council, u ong ruh ba katei ka jinglum khajna jong ki Dolloi, kam ju don satia, ha shwa ba kan mih, ka hukum, kaba la pynmih da ka Supreme Court, ha ka 29tarik Naitung 2016, hynrei ka Kashari kam shym la sngap satia bad kam shym la khang ruh ia ki Dolloi ba kin iaid shakhmat ia ka jinglum khajna jongki.
Ki Dolloi ka Jaintia Hills, kin rah ha kawei pat ka sngi bishar jong ka Supreme Court, halor ka ain thung Dolloi jong ka JHADC, kaba ka la pynmih ha u snem 2015, namar ba ka riti synshar ri, kam shym ai bor ia ka Council, ba kan tuklar, ia ka jingngeit lane lehniam jong kano kano ka kynhun jaitbynriew bad ka ai bor ia ka Council, ban thung ia ki Dolloi, ba kin synshar bad kam dei satia ba kan tuklar, ia ka kam niam, ong ka kyrwoh na U Ma C Lyngdoh, Chairman ki Daloi ka Ri Jaintia.
Phi don ban ong eiei?