Kyntait ka sorkar pdeng, ban ai T.17 klur ia ka GSWSS

Shillong, 8 Jylliew: 
Ka sorkar jylla ka la iakynduh jingeh shuh shuh mynta hadien ba ka sorkar pdeng ka la kyntait ban pynphai biang ia ka pisa ba la shim noh haduh T. 17 klur na ka skhim Greater Shillong Water Supply Scheme (GSWSS) Phase III.
Ka thymmei khubor sorkar, ka la iathuh ha kane ka sngi Nyngkong ba ka sorkar pdeng ka kyntait ban ai biang ia ka pisa wat hadien ba ka sorkar jylla ka la iai kyrpad kyrpon ban pynphai biang na ka bynta kane ka skhim sam um ha sor Shillong. Ka daw ka long ba ka sorkar pdeng ka la rai ban pynkut noh ia ka jingpyntreikam ia ki projek ka JNNURM. 
“Ngi la iasaid ia ka sorkar pdeng ba kan pyrkhat biang ban ai ia ka T. 17 klur hynrei ka sorkar pdeng kam pdiang satia namar ba la rai ban pynkut noh ia ki projek na kane ka skhim JNNURM”, la ong u heh sorkar jylla.
Kham mynshwa, ka sorkar pdeng ka la shim noh ia ka pisa haduhT.17 klur hadien ba ka sorkar jylla kam lah ban pynbiang ia ki jingdonkam katkum ki kyndon ba la buh.
 ”Kawei na ki kyndon ka long ban pynlong ia ka elekshon  municipal.  Ngi la dep pyrshang ban pynlong ia ka elekshon hynrei namar ka jingpyrshah jong ki paidbah, ngim shym la lah”, la ong u Symbud Myntri Rangbah ba peit ia ka tnad PHE u Dr.  RC Laloo.
Namar ka jingbym ioh ia kane ka pisa, kane ka projek ka sahteng.
“Kumba ka long mynta, ka jingpyntreikam ia ki skhim, la sangeh lut. Ka jingpyntreikam kan sdang biang lada ioh pisa”, la ong u heh sorkar jylla.
Hynrei ha kawei ka liang, ka sorkar jylla ka la thmu ban pan pisa shuh sa T.46 klur ban pyniar ia kane ka skhim GSWSS Phase III shaduh New Shillong Township (NST).
”Ngi dang pyrshang ban wad pisa noh da ka ram na ka HUDCO”, la ong u heh sorkar jylla.
Lah ban kdew ba ka sorkar jylla ka la thmu ban pyndep ia kane ka projek ha u Lber mynta u snem hynrei namar ka jingbym ioh pisa, ka la sahkut noh tden.