Kyntait ka sorkar jylla, ban ai jingtip, halor ka jingiap U Bah Cherish

Shillong:Ka Kong Agnes Kharshiing, mynhynnin ka sngi ka la phah ia ka ujor, kaba nyngkong hapoh ka RTI Act sha ka First Appellate Authority Home Political Department, ha kaba ia dei bad ka jingkyntait ban jubab ia ka RTI ka ba ka la pan ha ka 30 /5/2022.

Haba ia kren bad ka kong Kharshiing ka la ong “Ha ka 30/5/22 nga la pan ia ka RTI halor ka kaiphot jingtohkit halor ka jingshah pyniap u bah Cherister field Thangkhiew ha kaba na ka liang kane ka tnad ka la kyntait ban jubab ia kane ka RTI”.

“Ka jubab kaba nga la ioh na ka POI Deputy Secreatary sha ka sorkar Megha laya, (Political) kaba la jubab shai ba ka sorkar ka la kyntait ban pyn paw ia kane ka kaiphot kaba halor ka section jong ka 8 (i)(a) bad ka section 8 (i)(g) jong ka Right and Information Act 2005” ka la ong.
“Mynta ka sngi nga la phah biang sha ka First Appellate Authority Home Political Department, ba kin ai ka jubab namar ba kane ka case ka dei ka ba ki la pyniap ia u briew ha ing jong u, ha kaba ka dei kaba shai ba ka don ka Violation of human right” la ong ka kong Agnes.

Ka la bynrap shuh shuh “Ngi la dep ban iohi ki don ki kyndon ba ki la pyni ia ka daw ba kim kwah ban ai ia ka jubab ia ka RTI halor ka kaiphot ka jingshah pyniap u bah Cheristerfield Thangkhiew, hynrei ha ba don ka Violation of Human right kim lah ban kyntait ia kane”.
Ka la ong ruh “Na ka liang jong nga, ngan hap ban ujor biang ha ka State Information Commissioner, halor kane ka jingbym lah ban ai jubab jong ki”.
Ka kong Kharshiing ka la ong ruh “Ha kaba ia dei bad kane ka jingbym treh ban jubab jong ki, ka lah ban don kaei kaei ka ba ki ialeh ban buhrieh ia ka kaiphot”.

“Hynrei ka jingkwah jongngi, ba ki dei ban pynpaw ia ka kaiphot ka long namar ba ngim kwah ba kum kine ki jingjia kin dang don da kaba kin leit mynmiet myniong bad kin shu pyniap ia ki briew bad ngi kwah tip kaei ba ka kynhun tohkit ka lap ha ka jingtohkit jong ka halor kane ka jingshah pyniap u bah Thangkhiew”.
Lah ban kdew hangne ba ha ka 13/8/2021 u bah Cheristerfield Thangkhiew u nongialam barim ka seng kiengatiar HNLC u la shah pyniap hapoh ka ingsah jong u bad na ka liang ka sorkar ka la thung ia ka Commission Inquiry ban tohkit halor kane ka bynta bad ka Commission ka la dep ban aiti ia ka kaiphot jingtohkit ha ka tnad Home (Political).