“Kyntait ka sorkar India ban iakren ia ka GNLA”

Shillong, 8 Nailur:
Ka sorkar Jylla, ka kren sngewkhia shibun, halor ka jingbyrngem jong ka GNLA ban ther bom ia ki ophis sorkar, halor ka nongrim, ba u myntri rangbah ka Jylla, u khot iakren, tang ia ka HNLC. Ka khubor sorkar, ka ong ba ka GNLA, ka byrngem ban pynbthei bom ia ki ophis sorkar bad kumjuh ruh ia ki ophis jong ka seng Congress, namar ba u myntri rangbah, um kwah ban iakren bad ki seng kaikhlaw sha Garo Hills, katba u kwah ban iakren tang bad ka HNLC.
Halor kane ka phang, la iathuh ba ka sorkar Jylla, ka la thoh sha ka sorkar India, ban iakren bad ka GNLA lem bad kiwei de ki seng kaikhlaw jong ka Jylla, hynrei, la ong, ba namar ba ka GNLA, ka dei ka seng eh rang, kumta ka sorkar India, ka la kyntait ban iakren bad katei ka seng, namar ba ki dei kiba dang iai bteng ha ki kam pyntriem ha Garo Hills.
Ka sorkar Jylla, ka kren shai ba ka kwah ia ka jingsuk hapdeng baroh ki jait bynriew, na ka bynta ka roi ka par ha ka Jylla hi baroh kawei.