Kyntait ka ophis U DGP, ia ka shithi Sur Ki Pulit

Shillong: Hadien ba ka shithi lyngba ka dak ka la wan poi ha ka ïing ka sem jong u Bah Cheristerfield Thangkhiew ha kine ki khyndiat sngi ba la leit noh ba la ioh pdiang na kata ka kynhun kaba la kam ialade kum ka kynhun jong ka Sur Ki Pulit Ba Lah Shongthait kaba la sei madan ia ki kam pyrshah ia ki pulit kiba la donkti ban dkhat jubor ia ka jingim jong u Bah Cheristerfield Thankhiew ha ka 13 tarik u bnai Nailar 2021.

Ha ka 27 tarik u bnai Nailur 2021, na ka liang ka ophis jong u Director General of Police(DGP) Meghalaya ka la kyntait ia kane ka jingkynnoh jong ki laingut ki briew kiba la kam ialade kum ki pulit kiba la shongthait na ka kam bad ha u kyrwoh ba lah phah lyngba u Assistant Inspector General of Police A Meghalaya Shillong sha ki lad pathai khubor ha ka 27 tarik u bnai Nailur 2021, ka ophis jong u Director General of Police ka la kdew ba ka jingthoh ha ka shithi ba la pynmih ha ki lad pathai khubor kaba la kdew kti pyrshah ia u Director General of Police, u R Chandranathan, ia ki arngut ki IPS Officer kiba kynthup ia Jagpal Singh Dhanoa bad ia u Shailendra Bamaniya bad kumjuh ruh ia u Mukesh Kumar Singh ba ki la donkti ban dkhat jubor ia ka jingim jong u Bah Cheristerfield Thangkhiew ki long tang ki jingkynnoh ki bym don nongrim hangno hangno ruh bad ki bym dei kiba shisha.