Shillong: Ki nongshong shong jong ki hynniew shnong ki ba hap ka Dorbar Pyllun ki Hynniew Shnong mynta ka sngi ki la wan ban pynpaw ia ka jing bym lah pdiang ia ka rai ban ithuh ia u bah Livingstone Mylliem kum U Rangbah Shnong ba shipor jong ka Lumrit village.
Haba ia kren bad ki nongpathai khubor, u symbud rangbah shnong jong ka shnong Lumrit u bah Orktbest Kharumnuid u la ong “Ngi ki nongshong shnong jong ki shnong ki kynthup ia ki hynniew shnong ngin ym pdiang ban ithuh ia u rangbah shnong ba shipor bad na ka liang jong ka shnong ka pdiang ia u bah Lamjingmut Nongspung kum u rangbah shnong”.
U la iathuh ruh ba ki nongshong shnong jong ka shnong Lumrit lem bad ki hynriew tylli ki shnong ki kwah ban tip na Syiem jong ka Hima Khyrim ba kaei kadaw jong ka jing pynkynriah noh ia u bah Nongspung na ka kam rangbah shnong.
“U Syiem u dei ban ai shuwa ka jingpynshai ha ka ne ka phang namar ba na ka liang jong ki nongshong shnong jong ka shnong lumrit ruh ngim don eiei pyrshah ia u ne u rangbah shnong hynrei kum no un shah weng na ka kam rangbah shnong bad kumno khlem jingtip kin thung da u wei u rangbah shnong ba shipor.”
U la iathuh ruh ba dei na ka daw ba ngim ioh jingpynshai ki nongshong shnong jong ki hynniew shnong, kin ym pdiang ne shah ban pynlong ia ka jing jied jong uwei pat u rangbah shnong ha ka shnong Lumrit.
Na ka liang jong ki shnong “Ngi la leit ban kynduh ruh ia u Syiem jong ka Hima Khyrim ban pan jingshai, hynrei na ka liang jong u syiem u la ong ba kane ka hap hapoh jong ka jing peit jong ka Shnat Raid Tynring na ka liang jong u syiem kam shym don kano kano ka jongthoh jingtar ban pyntikna, hynrei na ka ei ba la ju bud baroh shi katta ka shnong ka hap ha ka shnat raid Tynring.
Na ka liang ki nongshong shnong jong kine ki Hynniew shnong ki la pynpaw ba kin sa leit kynduh bad u Deputy CEM jong ka KHADC u bah Pyniaid Sing Syiem u ba long ruh u Executive Member in-charge Elaka ha kine ki sngi ban wan ban ia kren shaphang kane ka bynta.
Kine ki Hynniew shnong ki kynthup ia ka Mawkynring, Lumkseh, Wahmyntait, Mawkduk, Lumdiengngan, Lumrit and Kyrdeng.
Phi don ban ong eiei?