Kyntait ka JAC ia ka jingtyrwa ka DC, ban khot iakren

Shillong: Ka Kong Isawanda Laloo kaba dei ka Deputy Commissioner jong ka East Khasi Hills District, ka la khot ban iakren ia ki seng jong ki kali kamai hapoh ka shatri jong ka Meghalaya Joint Action Committee of Commercial Vehicle(MJACCV) ha ka sngi palei, hynrei na ka liang jong kane ka kynhun ka la kyntait ia kane ka jingkhot ban iakren.

Haba pynbna ia kane, u Bah Marbud Dkhar u ba dei u nongialam jong ka JAC u la iathuh ba ia kane ka shithi la iohpdiang lyngba ka whatsapp na ka ophis jong ka Deputy Commissioner bad u la ong ruh ba na ka liang jong kane ka kynhun ka la kyntait mardor ban leit iakynduh ia kane ka DC namar ka jingiakren kan long beit tang ha kaba iadei bad ka pynhiar dor ia ka petrol bad diesel.

Shuh shuh u Bah Marbud, u la ong ba ka jingialang ha ka sngi Saitjaiñ kan iaid beit kumba la pynbeit bad u la kyntu ruh ia baroh ki nongkitkam jong ki kynhun nongniah kali kamai na ki district baroh kiba hap ha ka jylla Meghalaya ba kin poi lang sha katei ka jingialang khnang ba kin ioh ban shim sa ia kiwei ki rai kiba kham tyngeh halor ka jingsngap mynthi jong ka Sorkar Jylla ha kaba iadei bad ki jingdawa ba ki la buh.