Kyntait ka HSPDP, ban bujli ia U Bah Ardent

Shillong, 31 Nailar:
Ka HSPDP ka la kyntait ia ka jingdawa ka UDP ban bujli noh da uwei u nongialam ha jaka jong u Bah Ardent M Basaiawmoit kum u nong ialam ka All Regional Parties Alliance (ARPA) ha KHADC.
Katkum ka jingong u Bah KP Pangniang ka jingdawa ka UDP kam long ka daw kaba shongnia ban bujli ia u Bah Ardent namar ba u dang don tang khyndiat por kum u CEM.
“Ngi sngew ba ka jingdawa kam long kaba shongnia ban bujli nongialam. Ka dang long tang san bnai naduh ba ka Executive Committee jong ka ARPA ka la shimti ia ka kam ban synshar ha KHADC”, la ong u Bah Pangniang uba dei ruh u secretary ka Parliamentary Party (PP) ka HSPDP.
Ka UDP kaba la dawa ban bujli noh ha jaka jong u bah Ardent ha ka sngi Palei, ka la phah ruh ia ka shithi ha kane ka sngi Thohdieng sha u secretary ka ARPA.
Katkum ka jingong u bah Pangniang ba ka jingdawa ka UDP ka dei kaba shu leh kyrkieh khlem da ka pyrkhat bha.
Ha ka jingshisha kum ia kane, lah ban iapynbeit tang da kaba iashong hakhmat ka miej hapdeng ki para MDC, la ong u Bah Pangniang.
“Ka long kaba eh ban bishar ia u briew tang hapoh san bnai ban pyniaid kat ia ka Council. Namarkata, ngim sngew iahap ia ka jingdawa bujli nongialam ka UDP”, la ong u Bah Pangniang.
Ha kajuh ka por, ka KHNAM ha ka jingialang jongka Central Executive Committee (CEC) ka la pynpaw ia ka jingthrang jongka ban long nongpyniasuk hapdeng ka UDP bad ka HSPDP ban weng noh ia ka kynrum kynram kaba la mih ha ka ARPA.