Kyntait ka HANM ba poi Bangla u President, yn bishar hadien ba lait phatok

Shillong,5jymmang:
Ki nongialam ka HANM ki la lum ia ka jingialang kyrkieh jong ki mynta ka sngi ban pyrkhat halor ka jingshah kem u President rangbah ka seng u bah Lamphrang Khar bani. Hadien ba la wai ka jingialang, haba ia kren bad u nongthohkhubor u General Secretary ka HANM u bah Damon-Dkhar u la ong ba ka seng ka la kyntait war ia ka jingkyn noh ki pulit ba u President u la leit sha Bangladesh ban ia kynduh ia ki nongialam ka HNLC, ‘dang ha ka 1 tarik, ngi dang ia donlang ha ka jingialang kaba long ha Assembly Hotel, bad ha ka sngi kaba bud u la shah kem-ngim lah ban pdiang ba u leit sha Bangla’ ong u GS ka HANM uba la pynshai ruh ba ka HANM kam don jingiadei eiei bad ka HNLC.
Halor ki jingkynnoh pat ba u President u don jingiadei bad ka HNLC ka HANM ia mynta ka la ong ba kam pat lah eiei namarba kim pat ioh ia kren bad u, ‘hadien ba u la mih na phatok, ngin bishar la katei ka jingkynnoh ka dei ne-em kaba shisha’ bynrap biang u bah Damon.U la ong ruh ba ka seng baroh kawei ka la lyngngoh hadien ba ki la ioh jingtip ba u President jong ki u la shah kem.
Ia u bah Kharbani, ki pulit ki la kem ha ka 2 tarik mynta u bnai na Rangthong, SWKH katba u dang wan phai sha Shillong, la kem ruh ryngkat ki saw ngut kiwei pat ba kynthup ia u bah Mighter Marwein uwei na ki nongkhaii dewiong , bad u wei pat u dkhot barim ka HNLC.