Kyntait ka China, ba ki shipai jongka, ki ioh kem ia u samla na Arunachal

Ka tnat kam bar ri jong ka China, mynta ka sngi, ka kyntait ba ki shipai jong ka People’s Liberation Army (PLA) ki la rah bor, ia uwei u samla uba 17 snem, uba na Siang District jong ka Arunachal Pradesh; hynrei katei ka khubor, ka ong ba ka PLA, ka peit ia ka surok, kaba don ha katei ka jaka bad ka khanglad ia kino kino ki jing ia rung bad ia mih beain.

U Tapir Gao, uba dei u dkhot jong ka Parliament, na Arunachal Pradesh, u iathuh hynnin ka sngi, ba uwei u samla, uba kyrteng U Miram Taron, ula shah rahbor ha ki shipai People’s Liberation Army (PLA), na ki bynta jong ka Lungta Jor kaba hap ha Siyungla bad katei ka jingjia, ka dei ha ka sngi hat majai. La ong shuh shuh, ba utei uba shah rahbor, u dei na u pud u sam jong ka India, ha Upper Siang district.

U Johny Yaiying, u dei u paralok jong U Taron, u iathuh, ba ula lait phet iap ialade bad u iathuh mar mar sha ki bor pulit, halor katei ka jingjia ia U Taron.

U nong aiktien ka sorkar India, haba kynthoh halor katei ka jingjia, ula ong “Ngam tip ia katei ka jingjia” bad u ong ba ki shipai ka People’s Liberation Army, ki pahara skhem bha ia u pud u sam jongki bad ki khanglad ruh, ia ka jing ia rung ia mih beain.

Na ka liang ki shipai India, ki la phah khubor ia ka PLA, ba kan wad ia utei u samla, uba jah bad ki shipai India, ki kam ba U Taron, u leit sha katei ka jaka, ban thiew kynbat bad ban beh mrad ruh, hynrei, ula bakla lynti noh ha katei ka jingiaid lynti jongu.