Kyntait ka BJP, bakwah tiket 2018, ki MLA Congress

Shillong, 19 Jylliew:
Ka seng Bharatiya Janata Party (BJP), ka la thung ia ki nongkitkam jong katei ka seng, ha West Jaintia Hills, ha ka 13tarik mynta u bnai.
Ha ka jingialang, ba la wan pyrman, da u nongialam jong katei ka seng, U Basu Chakra vorty, la jied ia U Ma JG Kyndiah, kum U President jong katei ka seng, nalor kiwei pat ki nongkitkam.
Ha kane ka sngi la ioh ruh ki jingkren na U District Incharge ha kaba u kyntu bad kyrpad ia ki para dkhot ba kin dei ki briew kiba tip briew tip blei, kiba don akor don burom bad ba sngewrit bad ki dei ruh ban long ki nongiarap ba hakhmat eh jong u paidbah ha kino kino ki jingeh kiba ia kynduh haka jingim ka jong ki khlem da niew shiliangkhmat. U la kyntu ruh ia ki, ba ki dei ban trei shitrhem bad ba kim dei ban trei na ka bynta ka myntoi shimet khnang ba ka jingiarap iaki paidbah ka long kaba khuid khlem da don ka jingbamsap bad ban iarap iaki paidbah ha ryngkat ka jingieid, ula kitbok kitrwiang iaka seng bad ki nongbud jong ka ba kin long kiba trei minot na ka bynta ka bha ka miat jong ki nongshong shnong.Ha kawei pat ka khubor, la iathuh ba ha ka 15 tarik mynta u bnai, la pynkup bor ia ki Mandal President bad kumjuh ruh jong ka Youth wing ha kaba la sakhi ha ka jingpyndon burom ia ka jingdap ar snem jong ka synshar ka sorkar NDA hapoh ka jingialam khmat jong U Myntri Rangbahduh jong ka Ri jong ngi U Narendra Modi kaba long ha Dorbar Shnong Dulong,Jowai.Ki dkhot ba la pynkupbor jong ka district ki long U Ma Reynold Passah ha Jowai Constituency, U Ma Nebarwell Kharbihthai ha Nartiang Constituency, U Ma Chanbor Sungoh ha Raliang Constituency bad U Ma Shaphrang Lyngdoh ha Mowkaiaw Constituency, katba ia U Ma Jersom Shylla, la jied kum U President ka BJYM (Youth Wing). Haba iakren bad U Ma Kyndiah, u iathuh ba ka kam jong kitei ki nongialam, ka long ban thaw ia ki Mandal bapher, ha kaba ula pynsngew ruh, ba katei kan shim por, kumba shiphew sngi eiei, ba kin jied ia ki nongialam bapher ha ki Constituency, kiba hap ha West Jaintia Hills District. U Ma Kyndiah, u iathuh shuh shuh, ba ka District hi ia mynta, kam pat iakren eiei ruh em, ha kaba iadei bad ki kandidet MLA 2018, wat la ki la don katto katne, kiba ki la i shankhmat, ba kin long kum ki kandidet MLA. Ha kajuh ka por, U Ma Kyndiah, u kyntait, ba ki don ki MLA Congress, kiba tyrwa ialade, ba kin ialeh na ka tiket BJP, ha ka elekshon 2018, hynrei, u ong ba katei ka kam, kan dei kaba yn jied hi da ki Mandal, kiba hap ha katei ka District.