Kyntait iashim bynta ki Rangbah shnong ha ka Tenancy Bill

Shillong, 31 Risaw:
Ka Synjuk ki Rangbah shnong (sor bad khap sor) ki la rai ba kin nym leit ia shim bynta ha ka jingialang ban pyllait paidbah ban pan jingmut halor ka Meghalaya Regulation of Landlords and Verification of Tenants Bill 2013.
Kane ka jingialang ban pyllait ia kane ka Bill kan long ha ka 1 tarik Naiwieng 2013 ha ka por 10:30 baje mynstep ha Yojana Bhavan Auditorium. Ka Synjuk ki Rangbah shnong ki la ong ba ka daw ba kim treh leit shim bynta ha katei ka sngi ka long ba ka sorkar ka la khein dew thala ia ki khlem da sam ne ai kopi shwa ia katei ka Bill kum baleh ia kiwei.
U General Secretary ka Synjuk u Bah RL Blah u la ong ha ka kyrwoh, ka long kaba sngew babe ba ka sorkar kam shym la pushe eiei ia ka jingpan jong ki Rangbah shnong ia ka kopi jong katei ka Bill ba kin ioh pule shwa.
“Ka jingbym sngap ka sorkar ka pyni ba ka niewpoh bad khein bein ia ka bor jong ki Rangbah shnong”, la ong u Bah Blah.
Ka Synjuk kala phah kopi ruh ia ka jing bym treh iashim bynta jong ki sha u Myntri Rangbah, Chief Secretary bad ki MLA ba kynthup jong ka Shillong North Constituency, ShillongWest constituency, Shillong East Constituency, Shillong South Constituency, Nongthymmai Constituency, Pynthor Umkhrah Constituency bad ka Mawlai Constituency.